"ერთიანი ნაციონალური მოძრაობის" ერთ-ერთი ლიდერი სალომე სამადაშვილი ტელეკომპანია "იმედის" მიერ გავრცელებულ ფარულ ჩანაწერებს ეხმიანება.
სალომე სამადაშვილის თქმით, გავრცელებული აუდიჩანაწერი სხვადასხვა დროს ფარული მიყურადებით განხორციელებული პირადი საუბრების ჩანაწერების მონტაჟია.
"ბევრი ადამიანი მწერს, ამიტომ აქ ვუპასუხებ: დღეს გავრცელებული ჩანაწერის შინაარსის განხილვაში არ შევალ-ეს არის სხვადასხვა დროს, ფარული მიყურადებით განხორციელებული პირადი საუბრების ჩანაწერების მონტაჟი. ანუ, რომ გესმოდეთ, შესაძლოა თქვენ საუბარს იწერდნენ, როდესაც ყავას სვავთ მეგობართან ერთად რომელიმე კაფეში ან რესტორანში. არაა გამორიცხული გისმენდნენ საკუთარ სამზარეულოშიც. ქართული ოცნება ისე გაიხრწნა, აღარც მალავს, რომ უსმენს, იწერს, უთვალთვალებს... ფარული ჩანაწერების ფრიალი რომ დაიწყო, მაშინ დაადგა ნაც მოძრაობის ხელისუფლება დაისის გზას. ახლაც ესეა, წრეზე არა, მაგრამ სპირალზე ტრიალებს ისტორია. ქოცების ადგილზე ამაზე უფრო ვიდარდებდი, ვიდრე ამ ჩანაწერის შინაარსზე. კოვიდის კარგი წამალი ისე კარგი ძილია-მადლობა ტელეიმედს, კიდევ ერთხელ დაგვარწმუნა დღეს ოცნების აგონიაში", - წერს სალომე სამადაშვილი.
სალომე სამადაშვილის განცხადებით, მასზე, როგორც საქართველოს პარლამენტის წევრზე, განხორციელებული უკანონო და ფარული მიყურადების შესახებ ინფორმაციას დიპლომატიურ კორპუსს მიაწვდის.
"დიდი ძმა გვისმენს-ხვალვე ყველა დიპლომატიურ მისიას, ბრუსელს, ვაშინგტონს ექნება ინფორმაცია, რომ ჩემზე, საქართველოს პარლამენტის წევრზე, საქართველოს ტერიტორიაზე, ხორციელდება უკანონო მიყურადება და ჩემი პირადი საუბრების ჩაწერა. იმედის უნიჭო 'კგბშნიკ' დირექტორს თუ მიაჩნია, რომ ვინმე დააზიანა, გარდა საკუთარი პოლიტიკური პატრონისა, ჩემი პირადი საუბრების ჩანაწერების უნიჭო კომპილაციის გასაჯაროვებით, ძალიან ცდება. ეს მახინჯი სისტემა დაინგრევა, გპირდებით! (უკანონო მიყურადებაზე სისხლის სამართლის პასუხისმგებლობასაც, ვისაც ეკუთვნის)", - წერს სამადაშვილი.
შეგახსენებთ, ტელეკომპანია "იმედმა" გაავრცელა აუდიოჩანაწერები. ერთ- ერთი აუდიომასალაში სავარაუდოდ სალომე სადამაშვილი უცნობ პირს ესაუბრება. მეორე აუდიომასალაში კი, სავარაუდოდ, გუბაზ სანიკიძე და მიხეილ სააკაშვილის ბიძა, თემურ ალასანია საუბრობენ.
ტელეკომპანია "იმედის" ცნობით, ფარული ჩანაწერები თავდაპირველად უკრაინულმა გამოცემამ გაავრცელა.
