მოსახლეობის მხრიდან ნამდვილად ვეღარ ვგრძნობთ იმ მზაობას, რომელიც რეალურად მათი ჯანმრთელობისთვის არის აუცილებელი. ამის შესახებ საქართველოს ჯანდაცვის მინისტრმა, ეკატერინე ტიკარაძემ ტელეკომპანია "იმედის" ეთერში განაცხადა.
მისი თქმით, რთულია კონკრეტული თარიღის დასახელება თუ როდიდან ვეღარ გაუძლებს ჯანდაცვის სისტემა დატვირთვას.
"საკმაოდ რთული ერთი რიცხვი დასახელება, როდის ვერ გაუძლებს სისტემა დატვირთვას, რადგან ჩვენ სისტემაში ბევრი რამ არის ცვლადი. ცვლადი არ არის მხოლოდ საწოლი ან სუნთქვის აპარატი. ეს ცვლადი არის ექიმიც და ექთანიც", - თქვა ტიკარაძემ.
ჯანდაცვის მინისტრის განცხადებით, საქართველოს წარმატება გაზაფხულზე ეს არ იყო მხოლოდ და მხოლოდ სამთავრობო გუნდის ეფექტიანი მართვისა და ასევე ექიმების ერთიანობისა და მაღალი კომპეტენტურობის შედეგი.
"ეს ასევე იყო ჩვენი მოქალაქეების დამყოლობისა და მათი მხარდაჭერის შედეგიც. სწორედ ეს არის დღეს ჩვენი წარმატების განმსაზღვრელი და არა ის, რამდენ საწოლს მოვაბილიზებთ ან სტუდენტები ჩაერთვება, ან დამატებითი პროფილის ექიმი გადამზადდება. ჩვენთვის დღესდღეობით მნიშვნელოვანია ჩვენი მოქალაქეების დამყოლობა და იგივე მხარდაჭერა, რაც გვქონდა გაზაფხულზე. ჩვენ ამას მაშინ ნამდვილად ვგრძნობდით თითოელი მოქალაქისგან, მათგან მოდიოდა სლოგანები დარჩი სახლში, გაუფრთხილდი შენი ოჯახის წევრს. დღესდღეობით დარჩა ისე, რომ დგანან ექიმები, რეანიმატოლოგები სადარაჯოზე, მაგრამ მოსახლეობის მხრიდან ნამდვილად ვეღარ ვგრძნობთ იმ მზაობას, რომელიც რეალურად მათი ჯანმრთელობისთვის არის აუცილებელი", - განაცხადა ეკატერინე ტიკარაძემ.
