"ქართული ოცნების" 7-მა მაჟორიტარი დეპუტატობის კანდიდატმა 2020 წელს პარტიას მილიონ ლარზე მეტი შესწირა. ამის შესახებ "საერთაშორისო გამჭვირვალობა - საქართველოს" შუალედურ ანგარიშში ვკითხულობთ, სადაც საქართველოს პარლამენტის 2020 წლის პარლამენტის არჩევნების კამპანიის დაფინანსების საკითხებია მიმოხილული.
"მმართველი პარტიის "ქართული ოცნების" 30 მაჟორიტარი კანდიდატიდან შვიდმა (მათი ოჯახის წევრებისა და ბიზნესპარტნიორების ჩათვლით) 2020 წლის იანვრის შემდეგ პარტიას 1 035 000 ლარი შესწირეს, რაც ამ პერიოდში პარტიის მიერ მთლიანად მიღებული შემოწირულობების 6%-ა.
მაჟორიტარობის შვიდივე კანდიდატი მსხვილი ბიზნესმენია და სხვადასხვა ფორმით მთლიანობაში 127 კომპანიასთან არის დაკავშირებული.
ეს კანდიდატები არიან:
ზაალ დუგლაძე
ანტონ ობოლაშვილი
გოჩა ენუქიძე
ზაზა ლომინაძე
ირაკლი ხახუბია
დავით სონღულაშვილი
ვასილ ჩიგოგიძე.
იყო ისეთი შემთხვევებიც, როდესაც ერთი მაჟორიტარი კანდიდატის ბიზნესპარტნიორები ერთსა და იმავე დღეს, ერთსა და იმავე ოდენობის თანხას სწირავდნენ პარტიას", - ვკითხულობთ ანგარიშში.
არჩევნებში მონაწილე 50 საარჩევნო სუბიექტიდან (პარტია და ბლოკი) 29 იყო ისეთი, რომელმაც 2020 წლის 1 იანვრიდან 15 ოქტომბრამდე შემოწირულება მიიღო.
ამ სუბიექტების მიერ მოზიდული შემოწირულებების ჯამმა 35 376 394 ლარი შეადგინა, აქედან მმართველ პარტიას "ქართული ოცნება - დემოკრატიულ საქართველოს" - 17 086 626 ლარი შესწირეს, პარტიას "ლელო საქართველოსათვის" - 5 075 844 ლარი, ხოლო საარჩევნო ბლოკში "ერთიანი ნაციონალური მოძრაობა - გაერთიანებული ოპოზიცია "ძალა ერთობაშია" შემავალმა პარტიებმა ჯამურად 3 735 583 ლარი მოიზიდეს.
როგორც აღნიშნული მონაცემებიდან ჩანს, ყველა საარჩევნო სუბიექტის ჯამური შემოწირულებების 48% მმართველმა პარტიამ "ქართული ოცნება - დემოკრატიული საქართველო" მიიღო.
ანგარიში სრულად იხილეთ ბმულზე.
