შეერთებული შტატების სენატის საგარეო ურთიერთობათა კომიტეტის თავმჯდომარე, რესპუბლიკელი სენატორი ჯიმ რიში და სენატის ევროპის ქვედა კომიტეტის უმცირესობის დემოკრატი ლიდერი, სენატორი ჯინ შაჰინი საპარლამენტო არჩევნებთან დაკავშირებით განცხადებას ავრცელებენ:
"მას შემდეგ, რაც 2012 წელს საქართველოს საპარლამენტო არჩევნებს ვაკვირდებოდით, ჩვენ ვნახეთ დემოკრატიის გაღრმავება და ეკონომიკის ზრდა.ქართველები ამ კვირას საპარლამენტო არჩევნებში ხმის მიცემისთვის ემზადებიან. ამის პარალელურად, მნიშვნელოვანია, რომ ყველა მხარემ პატივი სცეს და თავისუფალი და სამართლიანი საარჩევნო პროცესისთვის, საერთაშორისო სტანდარტებით იმოქმედოს და საარჩევნო ყუთის სანდოობა დაიცვას.
ამ წლის დასაწყისში საარჩევნო სისტემის მიმართულებით განხორციელებული კონსტიტუციური რეფორმები მნიშვნელოვანი ნაბიჯი იყო საქართველოს დემოკრატიული სანდოობის გასაძლიერებლად. ამ არჩევნების კარგად ჩატარება კიდევ უფრო მეტად განამტკიცებს ამ მიღწევებს და დაადასტურებს ქართველი ხალხის სურვილს, განაგრძოს სვლა ევროატლანტიკური ინტეგრაციისკენ.
მიუხედავად იმისა, რომ COVID-19 პანდემიამ ხელი შეუშალა დიდი რაოდენობით საერთაშორისო დამკვირვებლების წარმოდგენას საქართველოში არჩევნებზე, შეერთებული შტატები და საერთაშორისო საზოგადოების სხვა წევრები ყურადღებით დააკვირდებიან პროცესებს. ამიტომ კრიტიკულად მნიშვნელოვანია, რომ რუსეთის ფედერაცია არ ჩაერიოს საქართველოს არჩევნებში.
დამოუკიდებელ და დემოკრატიულ საქართველოს მრავალი საერთაშორისო მხარდამჭერი ჰყავს და რეგიონისთვის სასიცოცხლო მნიშვნელობა გააჩნია. ჩვენ ვაგრძელებთ ქართველი ხალხის, როგორც მეგობრებისა და პარტნიორების მხარდაჭერას და ვუსურვებთ მათ თავისუფალ, სამართლიან და სანდო არჩევნებს".