პარტია "კანონი და სამართლის" ლიდერი და საბურთალოს მაჟორიტარი დეპუტატობის კანდიდატი თაკო ჩარკვიანი, ბიძინა ივანიშვილსა და მმართველ პარტიას მოუწოდებს, რომ არჩევნების გაყალბებაზე არც კი იფიქროს. ამის შესახებ ჩარკვიანმა "ტვ პირველის" ეთერში განაცხადა.
მისივე თქმით, ის უკანონობის და შურიძიების წინააღმდეგია.
"უკანონობისა და შურისძიების მოწინააღმდეგე ვარ. ამიტომ, ჩემი რჩევა არის, გულწრფელი რჩევა იმ ადამიანისა, რომელიც 2012 წელს ელოდებოდა, რომ რაღაც იმედები გამართლდებოდა. ერთ-ერთი რიგითი ადამიანი ვიყავი, რომელიც ისე ელოდებოდა, როგორც მთელი საქართველო და ეგონა, რა სახელიც ჰქონდა მას ქველმოქმედისა, ის გაიმეტებდა თავის სამშობლოსთვის სახელმწიფოებრივად ქველმოქმედებას.
ახლა გულწრფელად ვურჩევ, რომ, აი, თავში არ გაივლონ, უბრალოდ გავწვებით რუსთაველზე, ამ შეურაცხყოფას არ მივაყენებინებთ, არავინ არ დაგვიჭირდება, არავინ ახალგაზრდებს არ გამოიყვანს გარეთ თვალების დასათხრელად.
ხალხი ამას არ აპატიებს, შიმშილია, განვითარება შეწყვიტა ქვეყანამ, ეკონომიკური განვითარება, მაჩანჩალად გვიცნობენ, ხალხი შიმშილობს, პენსიონერები სულს ღაფავენ. სადაც დავდივართ, მე რად მინდა გამოკვლევა, მთელი ზაფხული არ ჩამიმუხლავს, დავდივარ მთელი ზაფხული ჩაუმუხლავად", - თქვა თაკო ჩარკვიანმა.