ამ პოლიტიკური კლოუნისგან ივანიშვილის მთავრობა ერთი წელია ცდილობს წარმატებული მენეჯერის სახე შექმნას. ევროპული საქართველოს ერთ-ერთი ლიდერი გიგა ბოკერია პრემიერ-მინისტრ გიორგი გახარიას ფოთში გუშინდელ ვიზიტს ეხმიანება.
გიგა ბოკერიას თქმით, გახარიამ მისი მოკლე პოლიტიკური კარიერის მანძილზე, ყველა კრიტიკულ ვითარებაში ან არაკომპეტენტურობა და გულგრილობა გამოავლინა ან პირდაპირ კრიმინალური ქმედება ჩაიდინა.
"გუშინ ფოთში გახარია ჩამოვიდა და ივანიშვილის რეჟიმის რვაწლიანი მმართველობის ბოლოს საზეიმოდ განაცხადა, რომ შემდეგი ოთხი წელი ფოთის და სამეგრელოს აღმშენებლობის პერიოდი იქნება. ამ პოლიტიკური კლოუნისგან ივანიშვილის მთავრობა ერთი წელია ცდილობს წარმატებული მენეჯერის სახე შექმნას. იმის მაგივრად მეორე ტალღისთვის მომზადებულიყვნენ, კოვიდ პანდემიის დროს სწორედ ამაში დაიხარჯა უზარმაზარი ფინანსური და პოლიტიკური რესურსი.
არადა გახარიამ მისი მოკლე პოლიტიკური კარიერის მანძილზე, ყველა კრიტიკულ ვითარებაში ან არაკომპეტენტურობა და გულგრილობა გამოავლინა ან პირდაპირ კრიმინალური ქმედება ჩაიდინა. პანკისის ოპერაცია რომელიც პოლიციის მანქანების დაწვით დასრულდა, საპრეზიდენტო არჩევნებზე სამეგრელოს შტაბის ხელმძღვანელობისას იქ შექმნილი კლიმატი და განსაკუთრებით მასწავლებლებზე და დირექტორებზე სამარცხვინო ზეწოლა, რისი მაგალითიც ია კერძაიას ტრაგედიაა , სხვადასხვა დროს პროპუტინური ფაშისტური ჯგუფების ოპონენტებზე მიქსევის სამარცხვინო პრაქტიკა, ოთხოზორია-ტატუნაშვილის სიაზე სრული უმოქმედობა და ამ თემის უტიფრად უგულებელყოფა, მათი არდასჯა ვინც ხორავას ქუჩის საქმეზე დამნაშავეებს შეგნებულად ხელი დააფარა, გავრილოვის ქვეყანაში შემოშვება და 20 ივნისის ღამის დარბევა - ყველა ამ ეპიზოდში ივანიშვილის რეჟიმმა და კერძოდ გახარიამ ყველაფერი ქვეყნის და ჩვენი მოქალაქეების ინტერესების და უფლებების საზიანოდ გააკეთა", - ამბობს გიგა ბოკერია.
მისივე თქმით, გახარია დღეს კვლავ პრემიერობის კანდიდატია, ისე რომ არცერთ პოლიტიკურ დებატებში მონაწილეობა არ მიუღია.
"ივანიშვილის ეს კლოუნი დღეს კვლავ პრემიერობის კანდიდატია, ისე რომ არცერთ პოლიტიკურ დებატებში მონაწილეობა არ მიუღია. დებატებზე უარს ამბობს გახარია და მისი უფროსიც, ქვეყნის რეალური მმართველი ივანიშვილი. სხვათა შორის დებატებში მონაწილეობას თავიდან ირიდებს ერთიანი ნაციონალური მოძრაობაც - არც პრემიერობის კანდიდატი სააკაშვილი და არც პარტიის თავმჯდომარე ვაშაძე დებატებში მონაწილეობას არ იღებენ.
ევროპული საქართველო და მისი ყველა ლიდერი ახლაც მზად ვართ რომ ასეთ დებატები შედგეს- ოცნების, ენმ-ს და ევროპული საქართველოს ლიდერებს შორის", - აღნიშნავს გიგა ბოკერია.