გახარია თითქმის, ლამის დაადგა იმ კურსს, რასაც ნაციონალური მოძრაობა ახორციელებდა. ამის შესახებ დავით გარეჯას მონასტრის წინამძღვარმა, არქიმანდრიტმა კირიონმა "ალტ ინფოს" ეთერში დავით გარეჯას ირგვლივ არსებულ ვითარებაზე საუბრისას განაცხადა.
არქიმანდრიტმა კირიონმა გაიხსენა საზღვრის დადგენასთან დაკავშირებული მოვლენები 2012 წლის შემდეგომ დანიშნული პრემიერ-მინისტრობის პირობებში.
მისი განცხადებით, ირაკლი ღარიბაშვილის პრემიერობის დროს იყო გარკვეული პროგრესი, თუმცა მერე კვირიკაშვილი მოვიდა და საქმე გაიყინა.
"ღარიბაშვილი მიდის ხელისუფლებიდან და მის მიერ მომართული საქმე გაჩერდა. მოდის კვირიკაშვილი და მთლიანად არის უძრაობის პერიოდი, არც უარყოფითი, მაგრამ არც დადებითი, უძრაობაა.
ვხვდები მე კვირიკაშვილს ოთხჯერ თუ სამჯერ, მის კაბინეტში, გვაქვს საუბრები, თხოვნები, ის ხვდება მერე მიხეილ ჯანელიძეს, საგარეო საქმეთა მინისტრს და არის უცნაური პასუხი. იქ არის რაღაც ნიუანსები, რომელსაც ახლა დღეს ვერ ვიტყვი, რადგან გამოძიების მიერ ჯერ არ არის გაშლილი ეს თემა.
კვირიკაშვილი მეუბნება, რომ მიხეილ ჯანელიძეს შინაგან დონეზე არ ჯერავს ამისი და ამიტომ მეც დაბნეული ვარ, რა ვქნა არ ვიციო. მე გაოგნება გამოვხატე, რადგან აქ საუბარია ისეთ ფაქტზე, რომ აქ არ არის შინაგან რწმენაზე საუბარი, აქ არის საუბარი დოკუმენტებზე.
შემდგომ არის პრემიერი მამუკა ბახტაძე და მადლობა მას, სულ ვამბობს სადაც ვახერხებ ამის თქმას. მასაც ვხვდები მე ორჯერ და მას ავუხსენი ყველაფერი და ავუხსენი, რომ კომისიაში გლახად არის საქმე. მან მკითხა, მამა კირიონ, რა შეიძლება გავაკეთო მე, როგორც პრემიერმაო.
მე ვუთხარი, რომ აუცილებელია, სასწრაფოა კომისიის გაჯანსაღება, იმიტომ რომ ჩვენ ვერ მივდივართ ფაქტებამდე და ის იღებს შესაბამის ნაბიჯებს და იმ მოკლე დროში, როცა ის პრემიერი იყო, შეიძლება ითქვას ეს იყო სრული პოზიტივი ამ საქმეში. მაგრამ ახლა ვიტყვი ერთსაც, რომ არ აქვს მიწოლის ის ენერგია, რაც ჰქონდა ღარიბაშვილს, მაგრამ სრული პოზიტივი, კეთილშობილი კაცი, ნამდვილად სახელმწიფო მოღვაწე.
მერე მოდის გახარია, რომლის დროსაც არათუ გაიყინა საქმე და გაჩერებულია, სტაგნაციაა. ანუ თითქმის, ლამის დაადგა იმ კურსს, რასაც ნაციონალური მოძრაობა ახორციელებდა და აი აქ უკვე ხდება ჩვენი დაძაბულობა. გემახსოვრება ჩემი კრიტიკა მისდამი, როგორი მძაფრი და შეუვალი იყო. არ მოვრიდებულვარ არასოდეს არც ერთი ხელისუფალის, პარტიის თუ პრემიერის კრიტიკას, არასოდეს.
და აი ამ დაძაბულობის პიკზე, უშუალოდ მე და გახარიასაც კი გვაქვს დაძაბულობა ერთმანეთში, სულ ვკამათობთ და გვაქვს დაძაბული საუბრები. მე არ ვთმობ მასთან ამ პოზიციებს.
შემდეგ ბრუნდება პოლიტიკაში ირაკლი ღარიბაშვილი და მე მივდივარ მასთან და ვეუბნები, ირაკლი, აქ ხალხი საქმეში ვერ ერკვევა, ვერ იხედებიან ღრმად და ძალიან გთხოვ, დამეხმარე", - განაცხადა არქიმანდრიტმა კირიონმა.