„ნაციონალური მოძრაობა“ ყოველდღიურად ახერხებს ჩვენს გაოცებას, რადგან უკადრებელის მკადრებელი პოლიტიკური ძალაა, – ამის შესახებ აჭარის მთავრობის თავმჯდომარემ, თორნიკე რიჟვაძემ ბათუმში „ნაციონალური მოძრაობის“ მიერ ორგანიზებულ აქციასთან დაკავშირებით განაცხადა.
თორნიკე რიჟვაძის შეფასებით, უპასუხისმგებლო პოლიტიკოსების ამბიციებმა უამრავი ადამიანის სიცოცხლე და ჯანმრთელობა დააყენა რისკის ქვეშ.
„ჩვენს გაოცებას ყოველდღიურად ახერხებენ, რადგან უკადრებელის მკადრებელი პოლიტიკური ძალაა, ამას ვიტყვი პირდაპირ. ის, რომ ბევრი ადამიანის ჯანმრთელობა და სიცოცხლე რისკის ქვეშ დააყენეს, მათ კისერზეა. ეპიდემიოლოგიურად ურთულეს მდგომარეობაში მყოფ ქალაქს, განსაკუთრებით ბათუმს და ბათუმელებს ზურგში დანა ჩაარტყეს.
ჩვენ, როგორც პასუხისმგებლიანი ხელისუფლება ვმართავთ როგორც მომატებულ, ასევე შემცირებულ ეპიდ-შემთხვევებს, მაგრამ ყველას კიდევ ერთხელ მოვუწოდებ, რომ მოქალაქეების ჯანმრთელობას და სიცოცხლეს მათ ამბიციებს ნუ გადააყოლებენ. მით უმეტეს, რომ ეს მათთვის პოლიტიკურად წაგებული ბრძოლა იყო და გუშინ ეს კიდევ ერთხელ დამტკიცდა. შესაბამისად, არ ღირს ადამიანების სიცოცხლით გარისკვა” - განაცხადა მთავრობის თავმჯდომარემ.
თორნიკე რიჟვაძემ ნაციონალური მოძრაობის წევრებს მოუწოდა, რომ ექიმებს მისცენ საშუალება გააგრძელონ მუშაობა.
