რეგიონული განვითარებისა და ინფრასტრუქტურის მინისტრი მაია ცქიტიშვილი აცხადებს, ოპოზიციის ბრალდებები კონტრპროდუქტიულია, რადგან ადამიანები ხედავენ წვლილს, რომელსაც 30 წელია ბატონი ბიძინა და მისი ოჯახი, ახორციელებს.
ასე გამოეხმაურა მაია ცქიტიშვილი ოპოზიციის განცხადებებს ბიძინა ივანიშვილის მიერ იპოდრომიის ტერიტორიის თბილისისთვის გადაცემის შესახებ.
"ეს ყველა ბრალდება არის ძალიან კონტრპროდუქტიული, იმიტომ, რომ ადამიანები ხედავენ რეალურად წვლილს, რომელსაც დაახლოებით 30 წელია, რაც ქართუ ფონდი და ბატონი ბიძინა, მისი ოჯახი, ახორციელებს.
ეს არის საჩუქარი, რომელიც მას შეიძლება არ განეხორციელებინა და ძალიან ბევრი მსოფლიოში არსებობს ადამიანია, რომელიც ასეთი მასშტაბის ქველმოქმედებას არ მისდევს. ეს არის სწორედ მისი ოჯახის ხელწერა, მისი ხელწერაა, რომელიც წლების განმავლობაში, ათწლეულებია მიმართულია საკუთარ ქვეყანაზე ზრუნვაზე", - თქვა მაია ცქიტიშვილმა.
გუშინ, ცნობილი გახდა, რომ ფონდი ქართუ თბილისის მუნიციპალიტეტს "უსასყიდლოდ გადასცემს" ყოფილი იპოდრომის ტერიტორიას, სადაც თბილისის ცენტრალური პარკი გაშენდება.