თბილისის სახელმწიფო სამხატვრო აკადემიის გივი ყანდარელის სახელობის გობელენის მუზეუმში ცნობილი ისრაელელი მხატვრისა და მოქანდაკის გენადი როიტიხის გამოფენა გაიმართა.
გამოფენაზე წარმოდგენილი იყო მხატვრის გრაფიკული ნამუშევრები და კერამიკული ფოტოინსტალაციები.
გამოფენის მხარდამჭერი იყო „ისრაელის სახლი“. ორგანიზაციის ხელმძღვანელის იციკ მოშეს თქმით, „ისრაელის სახლი“, AEPJ-ის ეგიდით, როგორც ევროსაბჭოს მიერ სერტიფიცირებული ებრაული კულტურული მემკვიდრეობის ევროპული მარშრუტის ოფიციალური წარმომადგენელი საქართველოში, განსაკუთრებულ მნიშვნელობას ანიჭებს არამატერიალურ კულტურულ მემკვიდრეობის პოპულარიზაციას. გენადი როიტიხის შემოქმედებაში მნიშვნელოვანი ადგილი უკავია ებრაულ თემატიკას, ამიტომ ამ გამოფენის ერთ-ერთი მიზანი სწორედ ქართული საზოგადოებისთვის სახვითი ხელოვნებით გადმოცებული ისრაელის კულტურის გაცნობა იყო.
„ისრაელის სახლის“ კონცეფციის მთავარი მიმართულებაა სახალხო დიპლომატია, რომლის განუყოფელი ნაწილია კულტურული დიპლომატია. მხარეებმა უნდა წარმოადგინონ საკუთარი ქვეყნის კულტურა, სხვანაირად შეუძლებელია მაღალი დონის კავშირების ჩამოყალიბება, - აცხადებს იციკ მოშე.
მხატვარმა ისრაელიდან გამოფენაზე დასასწრებად ჩამოსვლა პანდემიისა და კარანტინის გამო ვერ მოახერხა, თუმცა პირდაპირი ჩართვით მიესალმა გამოფენის ორგანიზატორებს და მონაწილეებს.
გამოფენის კურატორი ხელოვნებათმცოდნე მანანა გიგიბერია იყო. ღონისძიებას ესწრებოდნენ თბილისის სამხატვრო აკადემიის რექტორი გია გუგუშვილი, ისრაელის ქნესეთის ყოფილი ვიცე-სპიკერი ხილიკ ბარი, მუსიკოსი ნიკოლოზ რაჭველი, სტუმრები ისრაელიდან.
გენადი როიტიხი - გამოჩენილი მხატვარი და მოქანდაკე მრავალწლიანი პედაგოგიური გამოცდილებით, რომელიც მონაწილეობს სოლო თუ სხვა მრავალ ჯგუფურ გამოფენაში ისრაელსა და სხვა ქვეყნებში. როიტიხის ქანდაკება „მემორანდუმ 10“ აღმართულია ისრაელის პარლამენტში - ქნესეთში.
როიტიხი უკრაინაში დაიბადა 1949 წელს. 1994 წელს ისრაელში ემიგრირდა. მას პროფესიული განათლება საქართველოში აქვს მიღებული. 1972 წელს დაამთავრა სოხუმის სამხატვრო სასწავლებელი, 1977 წელს თბილისის სამხატვრო აკადემია.