უმაღლეს სასწავლო დაწესებულებებში სწავლის განახლებას ცალსახად ახლავს თან COVID-19-ის მაღალი გავრცელების რისკი, ისევე, როგორც სხვა რესპირატორული ვირუსული ინფექციების, - განუცხადა "ჯი-ეიჩ-ენს" ეპიდემიოლოგმა ეკატერინე ქარქაშაძემ.
მისი თქმით, ეს განპირობებულია, ერთი მხრივ, აუდიტორიებში თავშეყრითა და სტუდენტებს შორის კონტაქტის გაზრდით, მეორე მხრივ კი იმით, რომ სტუდენტები ზოგადად წარმოადგენენ ყველაზე აქტიურს და მობილურ ჯგუფს საზოგადოებაში.
„ისინი აქტიურად მონაწილეობენ სოციალურ ღონისძიებებში, ხშირად სწავლასთან ერთად ითავსებენ სამსახურებს; ეს სწორედ ისაა, რაც ვირუსის გადაცემას და გავრცელებას უწყობს ხელს.
მოწოდებული რეკომენდაციების დაცვა, როგორიცაა პირბადეების ტარება, დისტანცირება, ხელების ჰიგიენა, ცხადია, შეამცირებს ვირუსის გავრცელების რისკს, მაგრამ გარკვეულ შემთხვევებში სრულფასოვნად (ან საერთოდ) ვერ ხდება ამ რეკომენდაციების შესრულება.
გასათვალისწინებელია დღევანდელი ეპიდემიური სტუაცია, როცა სახეზეა შემთხვევების ყოველდღიური ზრდა და ამ ფონზე სავსებით რეალურია ეპიდსიტუაციის გაუარესება. თუმცა კი დღეს აჭარა წარმოადგენს COVID-19-ის ეპიცენტრს საქართველოში, რეალურად არცერთი რეგიონი არ არის დაცული მსგავსი მდგომარეობისაგან.
ვფიქრობ, როდესაც უნივერსიტეტებში სწავლის დაწყება დააანონსეს, ეპიდემიის გავრცელების ეს სცენარი და რისკები გათვლილი იქნებოდა (უნდა ყოფილიყო, ყოველ შემთხვევაში). ჩემი მოსაზრებით, მოხდება სიტუაციაზე დაკვირვება სწავლის აღდგენის შემდეგ და ცუდი სცენარის ანუ ინფიცირებულთა რიცხვის მკვეთრი ზრდის შემთხვევაში, აჭარის რეგიონს გარეთ, ალბათ მოსალოდნელი იქნება ისევ დისტანციურ სწავლებაზე გადასვლა, ხოლო კარგი სცენარის ანუ შედარებით ნაკლებად ინტენსიური ზრდის პირობებში კი გაგრძელდება აუდიტორიებში სწავლა“, - განუცხადა „ჯი-ეიჩ-ენს“ ქარქაშაძემ.