ჩვენ შეგვიძლია დაახლოებით 100 მანდატის მოპოვება, რაც ბუნებრივია შექმნის იმის პირობას, რომ კოალიციის გარეშე ჩამოვაყალიბოთ მთავრობა. ამის შესახებ "ქართული ოცნების" აღმასრულებელმა მდივანმა, ირაკლი კობახიძემ იმედის გადაცემა "ნამდვილ ციფრებში" განაცხადა.
მისი თქმით, დღეს რეალურად შეუძლებელია რაიმე ჯანსაღი კოალიციის ფორმირება.
"დღეს სამწუხაროდ ისეთი სურათია პოლიტიკურ სპექტრში, რომ რეალურად შეუძლებელია რაიმე ჯანსაღი კოალიციის ფორმირება. ეს არის რეალობა. აქედან გამომდინარე, ყველანაირად დადებით მოვლენად უნდა შეფასდეს ის, რომ „ქართულ ოცნებას“ ამ არჩევნების შემდეგ ექნება ერთპარტიულად მთავრობის ფორმირების შესაძლებლობა. ჩვენთვის მთავარი ამოცანა არის იმ საქმის გაგრძელება, რომელიც დაწყებულია 2012 წლიდან. ჩვენ გარდატეხა შევიტანეთ პოლიტიკურ სისტემაში და ეს პროცესი უნდა გაგრძელდეს. ჯერ კიდევ ბევრი რამ არის გასაუმჯობესებელი, გამოსასწორებელი და მოხარული ვართ, რომ შემდეგი 4 წლის განმავლობაში გვექნება საზოგადოებისგან ამ საქმის გაგრძელების მანდატი", - განაცხადა ირაკლი კობახიძემ.