როდესაც ჩვენ ვსაუბრობდით შიდსზე 20 წლის წინ, საუბრობდნენ, რომ 2 წელში გვექნებოდა შიდსის ვაქცინა, თუმცა გავიდა 20 წელი და ეს ვაქცინა ჯერ ისევ არ გვაქვს, - განაცხადა გაეროს გენერალური მდივნის მრჩეველმა ჯანდაცვის საკითხებში, გიორგი ფხაკაძემ "დღის კურიერი" ეთერში.
მისი თქმით, როცა ვაქცინა გადადის ბოლო სტადიაზე, მხოლოდ 10% არის ვარგისიანი.
"ეს ნიშნავს, რომ თუ ვაქცინის 10 კანდიდატია, მათგან მხოლოდ ერთი შეიძლება იყოს კარგი ვაქცინა. ზუსტად ასტრაზენეკას ვაქცინამ გვაჩვენა ის, რასაც მე ვამბობდი 5 თვის უკან, რომ ჩვენ არ უნდა ვიყოთ ძალიან ოპტიმისტურები. როდესაც ჩვენ ვსაუბრობდით შიდსზე 20 წლის უკან, საუბრობდნენ, რომ 2 წელში გვექნებოდა შიდსის ვაქცინა, თუმცა გავიდა 20 წელი და ეს ვაქცინა ჯერ ისევ არ გვაქვს. ერთი რამ, რაც ჩვენ ვიცით ამ ვირუსის შესახებ, არაფერი არ ვიცით. არის ძალიან ბევრი ვარაუდები, მაგრამ, სამწუხაროდ, ბოლომდე არ ვიცით, როგორ მუშაობს ეს ვირუსი. ეს არის რეალობა. მაგალითად, ჩვენ გვაქვს ბოლო ინფორმაცია, რომ არის ერთი პაციენტი ჰონკონგიდან და ერთი ამერიკიდან, რომლებიც ხელახლა დაინფიცირდნენ. რა თქმა უნდა, რამდენიმე მილიონი დაინფიცირდა, მაგრამ განმეორების მხოლოდ 2 შემთხვევა დაფიქსირდა და ესეც ბევრ კითხვას აჩენს იმასთან დაკავშირებით, ვაქცინა როგორი ეფექტური იქნება", - თქვა ფხაკაძემ.
