პარტია "ქართული ოცნება - დემოკრატიული საქართველოს" აღმასრულებელი მდივნის, ირაკლი კობახიძის თქმით, ძლიერი საზოგადოებრივი მხარდაჭერის საფუძველზე არჩევნებზე დამაჯერებელ გამარჯვებას მოიპოვებენ.
კობახიძის თქმით, ქართული ოცნება კოალიციას გამორიცხავს "ნაცმოძრაობასთან", "ევროპულ საქართველოსთან", "ლეიბორისტებთან", "გირჩთან და ა.შ. ასევე, "პატრიოტთა ალიანსთან", "ბურჯანაძესთან", პრორუსულ პარტიებთან.
"კოალიცია ჩვენ არ დაგჭირდება, ასეთია დღევანდელი სურათი და ჩვენ დარწმუნებულნი ვართ, საზოგადოების მხარდაჭერის საფუძველზე ავიღებთ ბევრად მეტს, ვიდრე 50 პროცენტია. შესაბამისად, ჩამოვაყალიბებთ სტაბილურ საპარლამენტო უმრავლესობას. თუ ვსაუბრობთ თეორიულ ვარიანტებზე, ჩვენ, რა თქმა უნდა, გამოვრიცხავთ ნებისმიერ კოლიციას, როგორც „ნაცმოძრაობასთან“ და მის სატელიტებთან, როგორიც არის „ევროპული საქართველო“, „ლეიბორისტები“, „გირჩი“ და ა.შ. ასევე, ბუნებრივია, „პატრიოტთა ალიანსთან“, „ბურჯანაძესთან“, პრორუსულ პარტიებთან, რომლებიც სხვათა შორის, დღეს არიან ამ ე.წ. პროდასავლური პარტიების პარტნიორები. „ნაცმოძრაობა“ და „პატრიოტთა ალიანსი“ არის ერთი ბნელი მედლის ორი მხარე, ისინი ერთად აკეთებდნენ წლების მანძილზე რუსულ საქმეს საქართველოში, ეს არის მათთვის საერთო და სწორედ ეს აერთიანებს მათ და სწორედ ამის გამო სხედან ისინი საერთო მაგიდაზე, ვგულისხმობ „ნაცმოძრაობას“, მის სატელიტებს, „პატრიოტთა ალიანსს“ და ბურჯანაძეს, ისინი არიან გაერთიანებული რუსული საქმის გარშემო“, - განაცხადა კობახიძემ.
