რუსეთის განცხადებით დაადასტურა თბილისის ეჭვი, რომ პერევიდან ჯარების გაყვანის გადაწყვეტილება, მხოლოდ იმ მიზანს ემსახურებოდა, რომ კრემლი საერთაშორისო თანამეგობრობის თვალში ცივილიზებულ პარტნიორად წარმოჩენილიყო. რეალურად კი რუსეთი კონსტრუქციული ნაბიჯების გადაგმას არ აპირებს და არც დეოკუპაციის დაწყება შედის ფედერაციის გეგმებში, _ განუცხადა ჟურნალისტებს საქართველოს საგარეო საქმეთა მინისტრის მოადგილემ ნინო კალამდაძემ რუსეთის საგარეო უწყების განცხადებაზე კომენტირებისას.
"რუსეთის საგარეო საქმეთა სამინისტროს განცხადებასთან დაკავშირებით, ჩვენ იმთავითვე ვფიქრობდით და ვაცხადებდით ვარაუდებს, რომ ეს ნაბიჯი არ გულისხმობდა რაიმე სახის კონსტრუქციულობას და არც ერთ ეტაპზე რუსეთის ფედერაციის ხელისუფლებას არ უფიქრია ყოფილიყო კონსტრუქციული ან დაეწყო დეოკუპაციის პროცესი", _ განაცხადა კალანდაძემ და აღნიშნა, რომ ის ფაქტი, რომ დოვილის შეხვედრის დასრულების შემდეგ დაუყოვნებლივ გაკეთდა განცხადება, თითქოსდა ყველა სახის ვალდებულება, რომელიც რუსეთს აღებული აქვს თავის თავზე, დასრულებულია, მხოლოდ და მხოლოდ ადასტურებს ქართული მხარის ეჭვებს, რომ ეს ნაბიჯი მიმართული იყო იმისკენ, რომ დოვილში მკაცრი კრიტიკისგან აერიდებინა რუსეთს თავი და გამოჩენილიყო როგორც ცივილიზებული პარტნიორი საერთაშორისო თანამეგობრობის თვალში.
"ამ ტიპის განცხადება იმ ფონზე, რა ვითარებაც არის დღეს საქართველოში და იმ ფონზე, თუ რა განცხადებები კეთდება საერთაშორისო თანამეგობრობის მიერ, არის უკიდურესად ცინიკური საერთაშორისოდ აღებული ვალდებულებების უხეში დარღვევა და რაც მთავარია, სწორედ იმ პარტნიორების უხეში შეურაცხყოფა, ვის წინაშეც მას ეს ვალდებულებები აღებული აქვს და ვისთან ერთადაც რეალურად დიდ ტრიბუნაზე იდგა და განცხადებებს აკეთდება", - განაცხადა კალანდაძემ.
შეგახსენებთ, რომ დღეს, პერევიდან საოკუპაციო ჯარების გაყვანის შემდეგ, რუსეთის საგრეო საქმეთა სამინისტრომ განცხადება გააკეთა. "პერევის დასახლებული პუნქტიდან რუსული სასაზღვრო საგუშაგოს გაყვანით ჩვენ მიერ "მედვედევი-სარკოზის" გეგმის საეჭვოდ შესრულების საკითხი საბოლოოდ დახურულია", - ნათქვამია რუსეთის საგარეო საქმეთა სამინისტროს მიერ გავრცელებულ განცხადებაში, რომელიც პერევიდან რუსი ოკუპანტების გაყვანას ეხება. სერგეი ლავროვის უწყება პერევიდან რუსი ოკუპანტების გასვლას "კეთილი ნების მოქმედებას" უწოდებს.
