20-22 ოქტომბერს, აშშ-ის ათასწლეულის გამოწვევის კორპორაციის აღმასრულებელი დირექტორი დენიელ იოჰანესი საქართველოს 3-დღიანი ოფიციალური ვიზიტით ეწვევა. აშშ-ის დელეგაცია საქართველოს ათასწლეულის გამოწვევის 395,3 აშშ მილიონი დოლარის ღირებულების შეთანხმების („კომპაქტის") ფარგლებში მიმდინარე საქმიანობის პროგრესს შეაფასებს. აღნიშნული პროგრამა საქართველოს რეგიონებში ინფრასტრუქტურის რეაბილიტაციასა და საწარმოთა განვითარებას ითვალისწინებს.
კორპორაციის აღმასრულებელი დირექტორი დენიელ იოჰანესი და აშშ-ის ელჩი საქართველოში ჯონ ბასი, საქართველოს ფინანსთა მინისტრის კახა ბაინდურაშვილისა და საქართველოს ათასწლეულის ფონდის აღმასრულებელი დირექტორის გიორგი აბდუშელიშვილის თანხლებით, ქვემო ქართლისა და სამცხე-ჯავახეთის რეგიონებს ეწვევიან და გზის პროექტის პროგრესს შეაფასებენ. საერთო ბიუჯეტით 203,5 მილიონი აშშ დოლარი, კორპორაციის მიერ დაფინანსებული სამცხე-ჯავახეთის გზის რეაბილიტაციის პროექტი მიზნად ისახავს საგზაო-სატრანსპორტო ქსელის აღდგენას ამ ორ რეგიონში. პროექტის ფარგლებში მოხდება 220 კმ გზის მშენებლობა, მათ შორის თურქეთისა და სომხეთის საზღვრებამდე.
დელეგაცია, ასევე, მოინახულებს ათასწლეულის ფონდის აგრობიზნესის განვითარების პროექტის (ბიუჯეტი: 20.2 მილიონი აშშ დოლარი) ფარგლებში დაფინანსებულ, ახლად რეაბილიტირებული გზის გასწვრივ მდებარე საწარმოებს. გარდა ამისა, გაიმართება შეხვედრა ბორჯომისა და ბაკურიანის წყალმომარაგების პროექტების ბენეფიციარებთან. აღნიშნული პროექტები ხორციელდება ათასწლეულის ფონდის რეგიონული ინფრასტრუქტურის განვითარების პროექტის ფარგლებში (ბიუჯეტი: 57,7 მილიონი აშშ დოლარი) და მისი განმახორციელებელი ორგანიზაციაა საქართველოს მუნიციპალური განვითარების ფონდი.
ათასწლეულის გამოწვევის პროგრამის განხორციელების მიზნით საქართველოს მთავრობამ ფონდი - ათასწლეულის გამოწვევა საქართველოს დააარსა. 395,3 მილიონი აშშ დოლარის ღირებულების
პროგრამა ამერიკის შეერთებული შტატების მთავრობის გრანტია და საქართველოს მთავრობის პრიორიტეტების მიხედვით ხორციელდება. ეს გრანტი საქართველოს რეგიონებში ინფრასტრუქტურის რეაბილიტაციასა და საწარმოთა განვითარებას მოხმარდება.
