7 - 8 ნოემბერს, ყვარელში, ილია ჭავჭავაძის 173 წლისთავის აღსანიშნავად საზეიმო ღონისძიებები მოეწყობა. გაიმართება გამოფენები, კონცერტი და სპორტული ღონისძიებები. როგორც კახეთის საინფორმაციო ცენტრს ყვარლის მუნიციპალიტეტის გამგებელმა ლევან გამსახურდიამ განუცხადა, ღონისძიებები ადგილობრივი ბიუჯეტიდან დაახლოებით 10 000 ლარით დაფინანსდება.
მუნიციპალიტეტის გამგეობას ღონისძიებების გრაფიკი უკვე შემუშავებული აქვს: 7 ნოემბერს ყვარელში სახალხო ზეიმი გაიმართება, რომელიც 11:00 საათზე ყვარლის შესასვლელში, ილიას მონუმენტთან დაიწყება; შემდეგ ზეიმი ყვარლის ციხე-გალავანში გაგრძელდება; დღის განმავლობაში გალავანში კახეთის ყველა რაიონს წარმოდგენილი ექნება ფაცხები, სადაც ფოლკლორული ნამუშევრების გამოფენა - გაყიდვა და სამზარეულო მოეწყობა; მოხდება თექის მოთელვა, მატყლის გაჩეჩვა, ხინკლის მოხვევა, იქნება თათარაობა. პარალელურად ადგილობრივი ძალებით გაიმართება კონცერტი და ქართული ჭიდაობა.
ილია ჭავჭავაძისა და კოტე მარჯანიშვილის სახლ-მუზეუმებში გამოფენები მოეწყობა. ილიას სახლ-მუზეუმში ნიკო და ზურაბ ჭავჭავაძეებისადმი მიძღვნილი გამოფენა „ეროვნული მოძრაობა და ჭავჭავაძეები" გაიხსნება.
საღამოს, ილიას მუზეუმის წინ, ქართული ესტრადის ვარსკვლავების კონცერტი ჩატარდება.
8 ნოემბერს, ილია ჭავჭავაძის სახლ-მუზეუმში საზოგადო მოღვაწეების შეხვედრა მოეწყობა. ილიას სახლის ეზოში გამოიფინება სკოლის მოსწავლეების მიერ იქვე შექმნილი ნახატები, რომელსაც ჰქვია „ილია ბავშვების თვალით". ილიაობისთვის იგეგმება ყვარლის რეაბილიტირებული სპორტსკოლის გახსნაც.
ღონისძიებების ორგანიზატორი ყვარლის მუნიციპალიტეტის გამგეობასთან ერთად ტურიზმის დეპარტამენტია.
