პოლონეთის კონკურენციისა და მომხმარებელთა უფლებების დაცვის სამსახურმა UOKiK-მა რუსულ ენერგოგიგანტ „გაზპრომს“ 213 მილიონი პოლონური ზლოტის ოდენობით ჯარიმა დააკისრა, რაც 50 მლნ ევროს ეკვივალენტს შეადგენს.
როგორც პოლონური მარეგულირებელი ორგანო აცხადებს, ჯარიმის დაკისრების მიზეზია "გაზპრომის" უარი, გასცეს პოლონეთის მიერ მოთხოვნილი ინფორმაცია "ჩრდილოეთის ნაკადი 2"-ის პროექტის ფარგლებში ევროპულ კომპანიებთან გაფორმებული კონტრაქტების შესახებ.
UOKiK-ის ხელმძღვანელმა განაცხადა, რომ კონტრაქტების შესახებ ინფორმაცია წლის დასაწყისში მოითხოვეს.
პოლონეთის კონკურენციისა და მომხმარებელთა უფლებების დაცვის სამსახური იძიებს საქმეს ექვსი კომპანიის შესახებ, რომელთაც გაზსადენის ბალტიის ზღვის ფსკერზე მშენებლობის დაფინანსებისთვის, პოლონეთის გვერდის ავლით, კონსორციუმი შექმნეს.
კონსორციუმი შემდეგი კომპანიებისგან შედგება: Gazprom, Engie, Uniper, OMV, Shell და Wintershall Dea.
პოლონეთმა თავისი მკვეთრად უარყოფი პოზიცია "ჩრდილოეთის ნაკადი 2"-ის პროექტის შესახებ არაერთხელ დააფიქსირა.
პოლონეთის საგარეო საქმეთა მინისტრმა პროექტს საფრთხე უწოდა არამხოლოდ ევროპის ენერგეტიკული უსაფრთხოებისთვის, არამედ ევროპული სოლიდარობისთვისაც.
"ჩრდილოეთის ნაკადი 2"-ის პროექტით გათვალისწინებულია ევროპისთვის, ბალტიის ზღვის გავლით, რუსული ბუნებრივი აირის მიწოდება.
პროექტის განხორციელებას მკვეთად ეწინააღმდეგება შეერთებული შტატები.