საჩხერის რაიონ სოფელ პერევში ევროკავშირის მისიის წარმომადგენლები შევიდნენ, სადაც ისინი არსებულ ვითარებას შეისწავლია. მოგვიანებით, კი მისიის წარმომადგენლები პერევში არსებულ ვითარებასთან დაკავშირებით ჟურნალისტებისთვის კომენტარს გააკეთებენ.
აღსანიშნავია, რომ დღემდე ევროკავშირის მისიის წარმომადგენლებს რუსი ჯარისკაცები საჩხერის რაიონის ოკუპირებულ სოფელში შესვლის უფლებას არ აძლევდნენ.
ადგილობრივების განაცხადებით, კი ამ წუთებში რუსი ოკუპანტები კვლავ სოფლის შესასვლელში არსებულ საგუშაგოზე რჩებიან.
"გუშინ გარკვეული გადაადგილება შეინიშნებოდა და გვქონდა ინფორმაცია, რომ სოფლიდან გასვლას აპირებენ, მაგრამ დღეს მსგავსი არაფერი მომხდარა", - აცხადებს პერევის მოსახლეობა.
შეგახსენებთ, რომ გუშინ რუსმა ოკუპანტებმა საჩხერის რაიონის სოფელ პერევიდან გასვლა დაიწყეს. სოფლის შესასვლელში აღარაა რუსი სამხედროების საგუშაგოები. მათ სოფლის შუაგულში გადაინაცვლეს. რუსმა მესაზღვრეებმა სამორიგეო ჯიხურიდან ინვენტარის გატანა დაიწყეს.
როგორც ცნობილია, საგუშაგოზე დაახლოებით 5 რუსი ოკუპანტი უნდა იყოს. მათ აღარ შეუმოწმებიათ სოფლის ავტობუსი.
ისინი ამოწმებენ მანქანებს, თუმცა ადგილობრივ მოსახლეობას გადაადგილება თავისუფლად შეუძლიათ.
შეგახსენებთ, რომ 14 ოქტომბერს, ჟენევის მოლაპარაკებების მე-13 რაუნდის შემდეგ, რუსეთის დელეგაციის ხელმძღვანელმა განაცხადა, რომ რუსი ოკუპანტები უახლოეს მომავალში სოფელ პერევს დატოვებდნენ.
