"წარმატებაზე ვისაუბრებთ მაშინ, როდესაც რუსული მხარე 2008 წლის 12 აგვისტოს შეთანხმებას სრულად შეასრულებს", - ამის შესახებ საგარეო საქმეთა მინისტრის მოადგილემ ნინო კალანდაძემ პერევიდან რუსი ოკუპანტების გასვლის დაწყების კომენტირებისას განაცხადა.
"ამ წუთისთვის რთული სათქმელია რა სახის დინამიკა შეინიშნება. არის საუბარი იმაზე, რომ მცირე სახის მოძრაობას აქვს ადგილი, თუმცა რამდენად სანდოა ეს გადაადგილება ჩვენი მხრიდან ციდი გამოცდილებიდან გამომდინარე ძნელი სათქმელია", - აღნიშნა კალანდაძემ.
მინისტრის მოადგილემ ის შემთხვევა გაიხსნება, როდესაც რუსეთის მხრიდან გაკეთდა განაცხადება, რომ პერევიდან საოკუპაციო ძალა გავიდოდა, თუმცა "გავიდნენ იმისთვის, რომ უკან შემოსულიყვნენ".
"მათი ქმედებები სანამ ბოლომდე არ განხორციელდება პროგნოზის ძნელი გასაკეთებელია. თავისთავად თუ ეს მოხდება მივესალმებით ჩვენი მოქალაქეების ინტერესებიდან გამომდინარე. ამავდროულად, ეს იმის დასტურიც იქნება, რომ საერთაშორისო ძალისხმევამ შეიძლება ეფექტური შედეგი გამოიღოს, თუმცა წარმატებაზე ვისაუბრებთ მაშინ, როდესაც 2008 წლის 12 აგვისტოს ხელშეკრულება სრულად შესრულდება", - აღნიშნა კალანდაძემ.
შეგახსენებთ, რომ გუშინ რუსმა ოკუპანტებმა საჩხერის რაიონის სოფელ პერევიდან გასვლა დაიწყეს. სოფლის შესასვლელში აღარაა რუსი სამხედროების საგუშაგოები. მათ სოფლის შუაგულში გადაინაცვლეს. რუსმა მესაზღვრეებმა სამორიგეო ჯიხურიდან ინვენტარის გატანა დაიწყეს.
როგორც ცნობილია, საგუშაგოზე დაახლოებით 5 რუსი ოკუპანტი უნდა იყოს. მათ აღარ შეუმოწმებიათ სოფლის ავტობუსი.
ისინი ამოწმებენ მანქანებს, თუმცა ადგილობრივ მოსახლეობას გადაადგილება თავისუფლად შეუძლიათ.
შეგახსენებთ, რომ 14 ოქტომბერს, ჟენევის მოლაპარაკებების მე-13 რაუნდის შემდეგ, რუსეთის დელეგაციის ხელმძღვანელმა განაცხადა, რომ რუსი ოკუპანტები უახლოეს მომავალში სოფელ პერევს დატოვებდნენ.
