საჩხერის გამგებელი ზურაბ ცერცვაძე სოფელ პერევიდან რუსი სამხედროების გასვლის პროცესის დაწყებას ადასტურებს. ამის შესახებ ზურაბ ცერცვაძემ "ჯი-ეიჩ-ენს" განუცხადა.
"რუმა ჯარისკაცებმა სოფლიდან გასვლა დაიწყეს, მათ პერევის შესასვლელში საგუშაგო მოშალეს და სოფლის სიღრმეში გადაიტანეს", - განუცხადა"ჯი-ეიჩ-ენს" ცერცვაძემ.
თუმცა საჩხერის გამგებლის განცხადებით, მათთვის უცნობია რუსი ოკუპანტები სოფელს მთლიანად როდის დატოვებს.
შეგახსენებთ, რომ გუშინ რუსმა ოკუპანტებმა საჩხერის რაიონის სოფელ პერევიდან გასვლა დაიწყეს. სოფლის შესასვლელში აღარაა რუსი სამხედროების საგუშაგოები. მათ სოფლის შუაგულში გადაინაცვლეს. რუსმა მესაზღვრეებმა სამორიგეო ჯიხურიდან ინვენტარის გატანა დაიწყეს. როგორც ცნობილია, საგუშაგოზე დაახლოებით 5 რუსი ოკუპანტი უნდა იყოს. მათ აღარ შეუმოწმებიათ სოფლის ავტობუსი. ისინი ამოწმებენ მანქანებს, თუმცა ადგილობრივ მოსახლეობას გადაადგილება თავისუფლად შეუძლიათ.
შეგახსენებთ, რომ 14 ოქტომბერს, ჟენევის მოლაპარაკებების მე-13 რაუნდის შემდეგ, რუსეთის დელეგაციის ხელმძღვანელმა განაცხადა, რომ რუსი ოკუპანტები უახლოეს მომავალში სოფელ პერევს დატოვებდნენ.
