რუსეთისა და რუსებისთვის აფხაზეთის დახმარება ღირსების საკითხია და მას დამოუკიდებლობას ვერასოდეს ვერავინ წაართმევს. ეს განცხადება რუსეთის პრეზიდენტის ადმინისტრაციის ხელმძღვანელმა სერგეი ნარიშკინმა გააკეთა. ნარიშკინი სოხუმში იმყოფება და აფხაზეთში მიმდინარე ე.წ. საქმიან ფორუმში მონაწილეობს.
"ჩვენი კეთილი მეზობლის - აფხაზეთის დახმარება იმაში, რომ მან თანამედროვე და აყვავებული სახელმწიფო ააშენოს, რუსეთისა და რუსებისათვის ღირსების საკითხია. ეს კი იმიტომ უნდა გაკეთდეს, რომ ერთხელ და სამუდამოდ გაიფანტოს სხვა ქვეყნის პოლიტიკოსების ბოდვას მიმსგავსებული ფიქრები იმის შესახებ, რომ აფხაზეთს დამოუკიდებლობა და სუვერენიტეტი წაართვას. ეს არასოდეს არ იქნება", _ განაცხადა მედვედევის წარგზავნილმა სოხუმში.
შეახსენებთ, რომ სერგეი ნარიშკინი სოხუმში დღეს ჩავიდა. სოხუმის აეროპორტში მას აფხაზ სეპარატისტთა ლიდერი სერგეი ბაღაფში დახვდა. აფხაზური მედიის ინფორმაციით, ნარიშკინი აეროპორტიდან პირდაპირ სოხუმის ცენტრში მდებარე დიდების მემორიალთან გაემგზავრა და აფხაზი ბოევიკების ხსოვნის მემორიალთან ყვავილები მიიტანა.
