ბაქო-თბილისი-ყარსის სარკინიგზო მაგისტრალი 2012 წლის ბოლოს ან 2013 წლის დასაწყისში გაიხსნება. ამის შესახებ აზერბაიჯანის საგარეო საქმეთა მინისტრმა ელმარ მამედიაროვმა დღეს საქართველოს საგარეო საქმეთა მინისტრ გრიგოლ ვაშაძესთან შეხვედრის დასრულების შემდეგ ერთობლივ პრესკონფერენციაზე განაცხადა.
"ბაქო-თბილისი-ყარსი სარკინიგზო მაგისტრალის მშენებლობა 2012 წლის ბოლოს ან 2013 წლის დასაწყისში უკვე დასრულდება. შემიძლია გითხრათ, რომ მშენებლობა წარმატებით მიმდინარეობს და დროში ჩავეტევით", - განაცხადა მამედიაროვმა.
მისივე თქმით, ქართველ კოლეგასთან შეხვედრის დროს ჰუმანიტარული საკითხებიც განიხილეს.
როგორც აზერბაიჯანელმა დიპლომატმა აღნიშნა, საქართველოსა და აზერბაიჯანში კულტურის კვირეულები ხშირად ტარდება, თუმცა იმ მეგობრული ურთიერთობების გათვალისწინებით, რომელიც ორ ქვეყანას აკავშირებს შეიძლება კულტურულ ღონისძიებებს თვეებიც კი დაეთმოს.