„ამერიკელი კონგრესმენების ანგარიშში პირდაპირ ჩანს ლობისტების ხელი, პირველ რიგში, იმით, რომ მთლიანად იმ პათოსს, რომელიც ამ დოკუმეტიდან გამოსჭვივის, აცდენილია ერთი კონკრეტული ფრაზა" , - განაცხადა „ქართული ოცნების" აღმასრულებელმა მდივანმა,ირაკლი კობახიძემ ტვ „იმედის" ეთერში. მისი თქმით, ეს არის ფრაქციის ერთ-ერთი ფრთის მომზადებული შიდა დოკუმენტი და, ბუნებრივია, მასში ხარვეზების გაპარვის რისკი ბევრად უფრო მაღალია, ვიდრე სხვა შემთხვევაში.
„არსებობს ვაშინგტონის ოფიციალური პოზიცია საქართველოსთან და საქართველოს ხელისუფლებასთან დაკავშირებით. ეს პოზიცია რამდენიმე კვირის წინ კიდევ ერთხელ გაახმოვანა რიკერმა, რომელიც არის სახელმწიფო დეპარტამენტის ხელმძღვანელის მოადგილე. დღეს ზუსტად ანალოგიური განცხადება გააკეთა აშშ ელჩმა საქართველოში. ისინი აცხადებენ რომ საქართველო არის ამერიკის შეერთებული შტატების სტრატეგიული პარტნიორი და, გარდა ამისა, აღნიშნა, რომ არასდროს ყოფილა ქართულ-ამერიკული ურთიერთობები ისეთი მჭიდრო, როგორც დღესაა. ამით არის ყველაფერი ნათქვამი. ასეთი ანგარიშების ცალკეული ფრაზები, რომელიც ამოგლეჯილია ამავე ანგარიშის კონტექსტიდან, ბუნებრივია, ვერაფერს ცვლის. ამერიკის ელჩმა კიდევ ერთხელ აღნიშნა, რომ საქართველოს ჰყავს პროამერიკული ხელისუფლება და არასდროს ჰყოლია ასეთი პროამერიკული ხელისუფლება, როგორიც დღეს ჰყავს. ეს დასტურდება იმითაც, რომ ჩვენ პრაქტიკული კუთხითაც, კონკრეტული ნაბიჯებით ვაღრმავებთ თანამშრომლობას ამერიკის შეერთებულ შტატებთან სხვადასხვა სფეროში, მათ შორის, თავდაცვის სფეროში, რაც არის პრინციპულად მნიშვნელოვანი. იმავე ანგარიშში საუბარია იმის თაობაზე, რომ თავდაცვის სფეროში არასდროს ყოფილა ასეთი მჭირდრო თანამშრომლობა ორ ქვეყანას შორის. რამდენად ლოგიკური შეიძლება იყოს, რომ საქართველოსა და ამერიკას შორის დღეს უპრეცედენტო მჭიდრო თანამშრომლობაა თავდაცვის სფეროში და იქვეა საუბარი, რომ ამ ხელისუფლების ლიდერი არის თურმე პუტინის ინტერესების გამტარებელი. იმდენად აცდენილია თვითონ შიგნით ამ დოკუმენტის 2 სხვადასხვა თეზისი ერთმანეთს, რომ აქ ყველაფერი აბსოლუტურად ნათელია. ჩვენ ვიცით, იყო სკანდალური ინფორმაცია იმაზე, რომ „ნაციონალური მოძრაობისგან" ფულს იღებს IRI-ის ბორდის ვიცე-პრეზიდენტი. ასეთ ტრანზაქციებს აქვს თავისი მოკლევადიანი შედეგები, მაგრამ ამის მიღმა ეს ურთიერთობები ვერ წავა, გამომდინარე იქედან, რომ ძალიან კარგად იცის ყველაფერი ქართულმა საზოადოებამ და ამერიკის შეერთებულმა შტატების ხელისუფლებამ", -განაცხადა ირაკლი კობახიძემ.
