გროზნოში ჩეჩენი ხალხის მსოფლიო კონგრესი დასრულდა. რუსული მედიის ინფორმაციით კონგრესს გროზნოდან, რუსეთში სხვა რეგიონებიდან და საზღვარგარეთიდან ათასამდე დელეგატი ესწრებოდა. კონგრესზე აირჩიეს პრეზიდიუმი, რომლის ხელმძღვანელად ჩეჩნეთის მეთაური რამზან კადიროვი დაასახელეს.
რუსული მედია წერს, რომ აღნიშნული კონგრესი გროზნოში არა მხოლოდ იმიტომ ჩატარდა, რომ რამდენიმე ხნის წინ ვარშავაში ჩეჩნეთის დევნილობაში მყოფი მთავრობის ყოფილი პრემიერ-მინისტრის ახმედ ზაკაევის მიერ ორგანიზებული ჩეჩენი ხალხის მსოფლო კონგრესის საპირწონე ყოფილიყო, არამედ იმიტომაც, რომ იგი აღქმულიყო 1990 წელს ჩატარებული ჩეჩენი ხალხის მსოფლიო კონგრესის გაგრძელებად, რომლის მეთაურიც 1991-დან 1996 წლამდე ჩეჩნეთის პრეზიდენტი ჯოჰარ დუდაევი იყო.
გროზნოში ჩატარებული კონგრესი ფაქტიურად "გამარჯვებულთა ყრილობად" გამოაცხადეს - წერს გაზეთი "ვრემია ნოვოსტეი". კადიროვის თქმით, ჩეჩნები ორი ათწლეულის განმავლობაში იბრძოდნენ სამი მთავარი მიზნის მისაღწევად: იყვნენ ჩეჩნეთის პატრიოტები და პატრონები, იცხოვრონ მშვიდობიანად და თავისუფლად და იყვნენ ჩეჩნები.
"დღეს ჩვენ ჩვენი რესპუბლიკის პატრონები ვართ. ჩვენ გვაქვს სრული თავისუფლება და ისლამის კანონების დაცვის ყველა შესაძლებლობა. ჩვენ შეგვიძლია თავისუფლად ვიყვიროთ მთელს მსოფლიოში, რომ ვართ მუსულმანები და ვართ ჩეჩნები" - აცხადებს რამზან კადიროვი და დასძენს, რომ ჩეჩენი ხალხი არ არის დამნაშავე იმ ტრაგედიებში, რომელიც მან გადაიტანა - "არ არის დამნაშავე დეპორტაციებში და ორ გადატანილ ომში, რომლებმაც დაანგრიეს რესპუბლიკა".
ყოველივე ამაში ბრალდებულად კადიროვმა საგარეო მტერი დაასახელა და განაცხადა, რომ ეს არის ხალხი, რომლებიც "იმალება ევროპაში და იქიდან რესპუბლიკაში განხეთქილებას ცდილობს". მტერთა შორის კადიროვმა პირდაპირ დაასახელა ლონდონში მაცხოვრებელი ახმედ ზაკაევი და მას თავის მშობლიურ სოფელზე ცენტოროიზე თავდასხმაში დასდო ბრალი.
"ჩეჩნეთზე არ იღელვოთ, აქ ყველაფერი კარგადაა. ხოლო ისინი ვინც ევროპაში ცხოვრობენ თუკი დაიცავენ თავიანთ წეს-ჩვეულებებს, ტრადიციებს, კულტურას, ენას, მაშინ ჩეჩენ ხალხს ყევლაფერი კიდევ უფრო უკეთესად ექნება" - განაცხადა კადიროვმა და თავისი სიტყვების დასტურად მოიყვანა 37 ათასი ეს-ემ-ეს მიმართვა, რომელიც მას ხალხთან ინტერნეტით ურთიერთობის დროს გამოეგზავნა. "არცერთ მათგანში არ იყო გამოთქმული უკმაყოფილება რესპუბლიკაში ამჟამად გატარებადი პოლიტიკის მიმართ" - აცხადებს კადიროვი. ინფორმაციას ამის შესახებ გაზეთი "კომერსანტი" ავრცელებს.
აღსანიშნავია, რომ ჩეჩენი ხალხის მსოფლიო კონგრესის ჩატარების იდეა ჩეჩნეთის ახლანდელი ხელისუფლების წარმომადგენლებისა და ჩეჩნეთის დევნილობაში მყოფი, ყოფილი პრემიერ-მინისტრის ლონდონში მცხოვრები ახმედ ზაკაევს შორის მიმდინარე მოლაპარაკებებზე 2009 წელს გაჩნდა. ყრილობის ჩატარება იმავე წელს იგეგმებოდა. ეს გეგმა მაშინ ჩავარდა, როდესაც ზაკაევმა ჩეჩნეთში დაბრუნებაზე უარი განაცხადა. მაშინ კადიროვმა ზაკაევთან ყველა კონტაქტი გაწყვიტა და მას "მატყუარა" და "ქამელეონი" უწოდა.
შედეგად, დამოუკიდებელი იჩქერიის დევნილობაში მყოფმა მომხრეებმა კონგრესი ზუსტად ერთი თვის წინ პოლონეთში ჩაატარეს.
"ის ფაქტი, რომ ახმედ ზაკაევმა თანამდებობიდან წასვლისა და დამოუკიდებელი იჩქერიის დევნილობაში მყოფი მთავრობის დაშლის შესახებ განცხადება გააკეთა, იძლევა იმის თქმის საშუალებას, რომ დასავლეთში მყოფი იჩქერიული პოლიტ-ემიგრაცია გავლენას ვერ ახდენს რესპუბლიკაში რეალურად არსებულ ვითარებაზე, თუმცა ამავე დროს ვარშავაში ალტერნატიული კონგრესის ჩატარება არის იმის ნიშანი, რომ კადიროვი ჯერჯერობით ერთადერთი ნაციონალური ლიდერი არ არის" - წერს "ნეზავისიმაია გაზეტა".
