ევრობანკი საქართველოსა და სომხეთში მეწარმე ქალებისთვის ბიზნესსაკონსულტაციო მომსახურების პროგრამას დაასრულებს და გამორჩეულებს დააჯილდოებს.
ევრობანკის ბიზნესსაკონსულტაციო მომსახურების ქალ-მეწარმეთა პროგრამაში საქართველოსა და სომხეთში 800-ზე მეტმა ქალმა მიიღო მონაწილეობა.
ევრობანკის განმარტებით, ქალი მეწარმეების მხარდაჭერის ორწლიანი პროგრამა საქართველოსა და სომხეთში არის ბანკის ერთ-ერთი პრიორიტეტი - დაეხმაროს ქალებს საკუთარი პოტენციალის რეალიზაციაში, რათა მათ თავიანთი წვლილი შეიტანონ ქვეყნის ეკონომიკურ განვითარებაში.
პროგრამის ბენეფიციარებმა მცირე და საშუალო ზომის საწარმოების განვითარებისთვის მიიღეს მცირე გრანტები და ტექნიკური დახმარება, რაც ჯამში 810,000 ევროს შეადგენდა. ამან, თავის მხრივ, მნიშვნელოვანი გავლენა იქონია აღნიშნული ქვეყნების მცირე ბიზნესის სექტორში საერთო ეკონომიკურ მდგრადობაზე.
"გენდერული თანასწორობა და ქალი მეწარმეების გაძლიერება მნიშვნელოვანია ეკონომიკური განვითარებისთვის. ამ ქალთა დაფასებით ვადასტურებთ, რომ მათ რეალურად შეაქვთ წვლილი ქვეყნის განვითარებაში. მათი საქმიანობა და წარმატება განაპირობებს მნიშვნელოვან ცვლილებებს ადამიანების ცხოვრებაში ვიმედოვნებთ, რომ აღნიშნული რეალური და პოზიტიური ქმედებების განხორციელებით მეტი ადამიანი გახდება მოტივირებული და მოისურვებს ამ ინიციატივაში მონაწილეობას", - განაცხადა ევრობანკის საწარმოთა მართვის რგოლის ტრანსფორმირებისა და ბიზნესსაკონსულტაციო მომსახურების პროგრამის დირექტორმა შარლოტ რუემ.
საქართველოსა და სომხეთში ბიზნესსაკონსულტაციო მომსახურების ქალ მეწარმეთა პროგრამის დონორები არიან კანადის საერთაშორისო განვითარების სააგენტო (CIDA), ევრობანკის ადრეულ გარდამავალ ეტაპზე მყოფი ქვეყნების ფონდი (EBRD ETC Fund) და ტაიპეი ჩინეთი.
როგორც ევრობანკის განცხადებაშია აღნიშნული, პროგრამის განხორციელების პროცესში 36 ფოკუსჯგუფი და მუშა შეხვედრა გაიმართა. გამოვლინდა რეგიონში ქალი მეწარმეების წინაშე არსებული ბარიერები და დაიგეგმა ფართო მასშტაბიანი ბიზნესტრენინგები მათი ბიზნესპრობლემების გადაჭრის მიზნით.
პროგრამას განხორციელებული აქვს 86 საკონსულტაციო პროექტი, რომელთა მიმდინარეობისას მეწარმე ქალებმა მიიღეს დახმარება კვალიფიციური საკონსულტაციო ჯგუფისაგან. პროგრამის ფარგლებში საკონსულტაციო პროექტების თანადაფინანსებისთვის გაიცა 9,000 ევრომდე გრანტები - საწარმოს ადგილმდებარეობის და ბიზნესის სიმწიფის მიხედვით. პროგრამა ეხმარებოდა ქალ მეწარმეებს ახალი სამუშაო ადგილების შექმნაში - ახალი ბიზნესის წამოწყების გზით ან არსებულ საწარმოებში მოცულობების გაზრდით, განსაკუთრებით კი ქვეყნის სხვადასხვა რეგიონში.
პროექტების უმრავლესობა მიზნად ისახავდა კომპიუტერული ფინანსური. მართვის საინფორმაციო სისტემების (41%) შემუშავებას და დანერგვას. ასევე განხორციელდა პროექტები, რომლებიც ბენეფიციარებს უზრუნველყოფდნენ რეკომენდაციებით ბაზრის ანალიზის და დაგეგმარების (37%) სფეროში. პროექტების დაახლოებით 75% მომსახურების სფეროში, ხოლო თითქმის ნახევარი მათგანი რეგიონებში განხორციელდა. მთლიანობაში ბენეფიციარი საწარმოების 93%-ში 50-ზე ნაკლები თანამშრომელი მუშაობდა (თითო საწარმოში).
ბიზნესსაკონსულტაციო მომსახურების პროგრამა საქართველოში 2003 წელს დაარსდა ევროკავშირის დაფინანსებით. შემდგომში დაფინანსება გამოიყო ასევე ევრობანკის ადრეულ გარდამავალ ეტაპზე მყოფი ქვეყნების ფონდიდან ((EBRD ETC Fund) ), კანადის საერთაშორისო განვითარების სააგენტოდან, ჩინეთის ტაიპეიდან და უახლოეს წარსულში - ევრობანკის აქციონერთა სპეციალური ფონდიდან (EBRD Shareholders' Special Fund). ბიზნესის საკონსულტაციო მომსახურების პროგრამას საქართველოში სულ განხორციელებული აქვს 513 პროექტი მცირე და საშუალო საწარმოებისთვის. აღნიშნულ პროექტებში 191 საკონსულტაციო კომპანია იყო ჩართული.
