ჯანმრთელობის მსოფლიო ორგანიზაციამ გააკეთა დროული და პროფესიონალური რეაგირება კორონავირუსის პანდემიის წინააღმდეგ და თავის საქმე შესანიშნავად შეასრულა. განაცხადა ჩინეთის საგარეო საქმეთა მინისტრმა, ვან იმ.
საგარეო საქმეთა მინისტრმა შეაფასა ასევე ჯანმრთელობის მსოფლიო ორგანიზაციის გენერალური დირექტორის, ტედროს ადჰანომ ღებრეიესუსის საქმიანობა.
"მან შესანიშნავად და სრულყოფილად იმუშავა, თავისი მანდატის ფარგლებში", - დასძინა ვან იმ.
ჩინეთის საგარეო საქმეთა მინისტრის მიერ ჯანმრთელობის მსოფლიო ორგანიზაციისა და მისი დირექტორის შექება პასუხია შეერთებული შტატების კრიტიკისა, რომელიც მიმართულია ჯანმო-ს საქმიანობისკენ.
შეგახსენებთ, 19 მაისს, შეერთებული შტატების პრეზიდენტმა, დონალდ ტრამპმა ტედროს ადჰანომ ღებრეიესუსს წერილი მისწერა, სადაც დაფინანსების სამუდამოდ შეწყვეტით დაემუქრა.
"ნათელია, რომ კორონავირუსის წინააღმდეგ გადადგმული თქვენი შეცდომებით აღსავსე ნაბიჯები მსოფლიოს ძალიან ძვირი დაუჯდა. ჯანმრთელობის მსოფლიო ორგანიზაციის წინსვლის ერთადერთი გზაა, რომ ნათლად დაანახოს სამყაროს, შეუძლია თუ არა იყოს სრულიად დამოუკიდებელი ჩინეთისგან", - წერდა ტრამპი.
შეერთებული შტატების პრეზიდენტის მკაცრ წერილში ხაზგასმულია, რომ ჯანმრთელობის მსოფლიო ორგანიზაცია "მუდმივად უგულვებელყოფდა სარწმუნო ცნობებს, რომ კორონავირუსი ჩინეთის ქალაქ უხანში 2019 წლის დეკემბრის დასაწყისში, ან უფრო ადრე გავრცელდა".