საქართველოს მოქალაქეებს თურქეთში სამკურნალოდ გამგზავრება დღეს, 20 მაისიდან შეეძლებათ. ამის შესახებ ინფორმაციას საქართველოს ელჩმა თურქეთის რესპუბლიკაში, გიორგი ჯანჯღავამ გაავრცელა.
"თურქეთის ჯანდაცვის სამინისტროს გადაწყვეტილებით, 20 მაისიდან ქვეყანაში სამკურნალოდ შემოსული პაციენტებისთვის მოიხსნება პანდემიის გამო დაწესებული შეზღუდვები, რომელიც შეეხება 31 სახელმწიფოს, მათ შორის საქართველოს მოქალაქეებს.
თურქეთის ჯანდაცვის სამინისტრომ დაადგინა შესაბამისი რეგულაციები ქვეყანაში შემოსასვლელად, საავადმყოფოში მისაღებად, სამკურნალოდ და იზოლაციის უზრუნველსაყოფად. ასევე თურქეთის ჯანდაცვის უწყება განსაზღვრავს სამკურნალოდ შემოსულ ადამიანთან ერთად თანმხლები პირების მიმართ დადგენილ რეგულაციებს/ნორმებს", - დაწერა გიორგი ჯანჯღავამ სოციალურ ქსელში.
