ჩრდილოეთ კავკასიაში ბინადრობის დადასტურება მოხდება ბინადრობის დამადასტურებელი ნებისმიერი დოკუმენტით. ამის შესახებ ნათქვამია საქართველოს შინაგან საქმეთა სამინისტროს ოფიციალურ განცხადებაში.
"საქართველოს ხელისუფლების გადაწყვეტილების თანახმად, რუსეთის ფედერაციის ჩრდილოეთ კავკასიის რესპუბლიკების (ჩეჩნეთი, ინგუშეთი, ჩრდილოეთ ოსეთი, დაღესტანი, ყაბარდო-ბალყარეთი, ყარაჩაი-ჩერქეზეთი და ადიღე), მაცხოვრებლებს საქართველოს ტერიტორიაზე უვიზოდ შემოსვლის უფლება მიეცათ. ჩრდილოეთ კავკასიაში ბინადრობის დადასტურება მოხდება ბინადრობის დამადასტურებელი ნებისმიერი დოკუმენტით. ჩრდილოეთ კავკასიის მაცხოვრებლებს საქართველოს შინაგან საქმეთა სამინისტრო საზღვრის გადაკვეთის მაქსიმალურად კომფორტულ პირობებს შეუქმნის", - ნათქვამია შსს-ს განცხადებაში.
ამასთან, განცხადებაში აღნიშნულია, რომ საქართველოს ხელისუფლების აღნიშნული ინიციატივა, მიზნად ისახავს ქართველი და ჩრდილოეთ კავკასიელი ხალხების ტრადიციული ძმური ურთიერთობების აღდგენისათვის ხელშეწყობას, მათთვის საშუალების მიცემას, ისარგებლონ ყველა იმ უპირატესობით, რომლითაც სარგებლობენ საქართველოს მოქალაქეები და ქვეყნის სტუმრები ბოლო წლების განმავლობაში გატარებული რეფორმებისა და მიღწევების შედეგად.
"ჩრდილოეთ კავკასიის მაცხოვრებლებს შესაძლებლობა ექნებათ საქართველოში იმოგზაურონ, დაკავდნენ ბიზნესით, მიიღონ განათლება, დაისვენონ და ისარგებლონ ყველა იმ სიკეთით, რომელსაც კორუმპირებული და რეპრესიული ფედერალური რეჟიმის პირობებში მოკლებული არიან სამშობლოში. საქართველო გახდება ხიდი, რომელიც ჩრდილოეთ კავკასიის მაცხოვრებლებს ცივილიზებულ სამყაროსთან დააკავშირებს", - აცხადებენ შსს-ში.
შეგახსენებთ, რომ დღეს ძალაში შევიდა საქართველოს მთავრობის განკარგულება, რომელიც ჩრდილოეთ კავკასიის რესპუბლიკების მოქალაქეებისთვის საქართველოში უვიზოდ შემოსვლას ითვალისწინებს. მათ საშუალება ექნებათ 90 დღის განმავლობაში საქართველოში უვიზოდ დარჩნენ.
