პოლიტიკური პარტია "ეროვნული ფორუმის" ლიდერის კახა შარტავას განაცხადებით, ახლად ჩამოყალიბებულ "ქართულ პარტიასა" და მის პარტიას შორის საერთო ენის გამონახვა ძალიან გაჭირდება.
ამის შესახებ შარტავამ, 8 ოპოზიციური პოლიტიკური პარტიისა და საქართველოში აკრედიტებულ დიპლომატიური კორპუსის შეხვედრის დამთავრების შემდეგ განაცხადა.
"ჩვენსა და "ქართულ პარტიას" შორის იმდენი განსხვავებაა შეხედულებებსა და მუშაობის სტილში, ვფიქრობ ძალიან გაჭირდება საერთო ენის გამონახვა. მათი მხრიდან განაცხადი უნდა გაკეთდეს, რისთვის და რატომ აფუძნებენ პარტიას და რა ვადებში განიხილავენ ამ პარტიის ისეთ ორგანიზაციად ჩამოყალიბებას, რასაც პოლიტიკური სუბიექტი ჰქვია. ზოგ ადამიანს, რომელიც ამ პარტიაში შეიძლება გაწევრიანდეს, საერთოდ არ ვიცნობ. ზოგიერთთან მქონია მუშაობის გამოცდილება," - განაცხადა შარტავამ.
შეგახსენებთ, რომ "ქართული პარტიის" პრეზენტაცია დღეს შედგა. პარტიის დამფუძნებლები ირაკლი ოქრუაშვილი, ლევან გაჩეჩილაძე, სოზარ სუბარი, კოკა გუნცაძე და ეროსი კიწმარიშვილი არიან.
