საქართველოს მესამე პრეზიდენტი და ოდესის რეგიონის ყოფილი გუბერნატორი, მიხეილ სააკაშვილი აცხადებს, რომ უკრაინის რეფორმების საბჭოს აღმასრულებელი კომიტეტის თავმჯდომარედ ნიშნავენ. აღნიშნულთან დაკავშირებით მან Deutsche Welle-სთან ინტერვიუში განაცხადა.
"აღმასრულებელი კომიტეტის თავმჯდომარე და არა მდივანი", - თქვა სააკაშვილმა ჟურნალისტის შეკითხვის საპასუხოდ, ინიშნებოდა თუ არა უკრაინის ეროვნული რეფორმების საბჭოს მდივნად.
ცოტა ხნის წინ, უკრაინული გამოცემა "ცენზორ.ნეტ"-ის მთავარმა რედაქტორმა, იური ბუტუსოვმა სოციალურ ქსელში დაწერა, რომ სააკაშვილს ვოლოდიმირ ზელენსკი უკრაინის ეროვნული რეფორმების ეროვნული საბჭოს მდივნად დანიშნავდა.
მანამდე ვრცელდებოდა ინფორმაცია, რომ ზელენსკიმ მიხეილ სააკაშვილს უკრაინის ვიცე-პრემიერის თანამდებობა შესთავაზა რეფორმების საკითხებში, თუმცა საკითხი უმაღლეს რადაში განსახილველად არ შესულა.
სააკაშვილმა განაცხადა, რომ ზელენსკიმ რეფორმების მიმართულებით მას ვიცე პრემიერის თანამდებობა შესთავაზა და დაავალა მოლაპარაკებების წარმოება მსოფლიო სავალუტო ფონდთან და სხა საფინანსო ორგანიზაციებთან.
უკრაინაში სააკაშვილის აქტიურ პოლიტიკაში შესაძლო დაბრუნებას საქართველოს ხელისუფლების წარმომადგენელთა შეშფოთება მოჰყვა. საქართველოს პარლამენტის თავმჯდომარემ არჩილ თალაკვაძემ თავის უკრაინელ კოლეგას დმიტრო რაზუმკოვს წერილი გაუგზავნა, სადაც მან საქართველოს ექს-პრეზიდენტის მიხეილ სააკაშვილის უკრაინის ვიცე-პრემიერის პოსტზე შესაძლო დანიშვნის გამო შეშფოთება გამოთქვა.
საქარველოს პრემიერ მინისტრმა გიორგი გახარიამ არ გამორიცხა, რომ სააკაშვილის თანამდებობაზე დამტკიცების შემთხვევაში, უკრაინაში საქართველოს ელჩს კონსულტაციებისთვის გამოიწვევდნენ.
მიხეილ სააკაშვილის ვიცე-პრემიერად შესაძლო დანიშნვას გამოეხმაურა საქართველოს პრეზიდენტი სალომე ზურაბიშვილიც.
