პარლამენტის დღევანდელ სხდომაზე კანონმდებლები ტელეკომპანია "თრიალეთის" დირექტორის დაკავებას გამოეხმაურნენ.
ოპოზიციამ პოლიციის მიერ ჯონი ნანიტაშვილის ცემის ფაქტი გააპროტესტა და დამნაშავეების დასჯა მოითხოვა.
საპარლამენტო უმრავლესობის წარმომადგენელი აკაკი მინაშვილი ოპოზიციას მოუწოდებს, რომ ვიდრე "მგზნებარე განცხადებებს" გააკეთებენს, საკითხი სრულყოფილად შეისწავლონ.
"თქვენ ჭეშმარიტებაზე ექსკლუზივი არ გაქვთ და ვიდრე განცხადებებს გააკეთებთ, კეთილი ინებეთ და მოგვმართეთ, ერთად გავარკვიოთ კონკრეტული საკითხი",' - აღნიშნა მინაშვილმა.
როგორც მინაშვილი განმარტავს, "თრიალეთის" დირექტორი დარღვევების გამო გააჩერა პოლიციამ.
"მან კი ჩათვალა, რომ აქვს იმის იმუნიტეტი, პოლიციისთვის წინააღმდეგობა გაეწია და მან შეურაცხყოფა მიაყენა პოლიციას, შემდეგ კი სასამართლომ დააკისრა ჯარიმა", -განაცხადა მინაშვილმა. მინაშვილს არაფერი უთქვამს იმაზე, რომ ოპოზიცია "თრიალეთის" დირექტორის არა დაჯარიმების, არამედ ცემის ფაქტს აპროტესტებს.
მის ამ განცახდებას კი ლევან ვეფხვაძემ ადგილიდან პროტესტით უპასუხა, თუმცა მას პარლამენტის თავმჯდომარემ განცხადების გაკეთების საშუალება არ მისცა.
