კონტროლის პალატის თავმჯდომარე იმ თანამდებობის პირების დასჯას ითხოვს, ვინც კონტროლის პალატის მუშაობას ხელს არ უწყობს.
ამის შესახებ ლევან ბეჟაშვილმა პარლამენტში საფინანსო-საბიუჯეტო კომიტეტის სხდომაზე, კონტროლის პალატის 2009 წლის მუშაობის ანგარიშის წარდგენისას, განაცხადა.
ლევან ბეჟაშვილი პარლამენტისგან შესაბამისი საკანონმდებლო ცვლილებების განხორციელებას ითხოვს.
როგორც ბეჟაშვილმა აღნიშნა, კონტროლის პალატის მუშაობა გარკვეულწილად ფერხდება იმის გამო, რომ ზოგიერთი თანამდებობის პირი კონტროლის პალატისადმი ინფორმაციის გადაცემას აჭიანურებს.
ბეჟაშვილს ასეთი თანამდებობის პირები არ დაუზუსტებია, თუმცა აღნიშნა, რომ მათი ასეთი დამოკიდებულება პრობლემას უქმნის კონტროლის პალატის მუშაობას და ნეგატიურად აისახება საბიუჯეტო პროცესზე.
სწორედ ამიტომ ლევან ბეჟაშვილი ითხოვს, რომ ასეთი თანამდებობის პირებს გარკვეული ადმინისტრაციული პასუხისმგებლობა დაეკისროთ. პარლამენტს კი მიმართავს თხოვნით, რომ მიიღოს შესაბამისი საკანონმდებლო ცვლილებები.
აღსანიშნავია, რომ ბეჟაშვილის ამ მოთხოვნას პარლამენტის მხრიდან ჯერჯერობით არანაირი რეაგირება და პასუხი არ მოყოლია.