მოვუწოდებთ ბიზნესსუბიექტებს, შეძლებისამებრ, განახორციელონ მოიჯარეების საიჯარო ქირისგან გათავისუფლება - ამის შესახებ აჭარის ფინანსთა და ეკონომიკის მინისტრმა ჯაბა ფუტკარაძემ ბრიფინგზე განაცხადა.
კორონა ვირუსის გავრცელების პრევენციისა და მოქლაქეების ჯანმრთელობის დაცვის მიმართულებით მიმდინარე საკითხებთან დაკავშირებით აჭარის მინისტრთა კაბინეტის ბრიფინგი გაიმართა.
აჭარის მთავრობის მიერ მიღებული გადაწყვეტილებით, 1 აპრილამდე ე.წ ხოფის ბაზრობის, ასევე ყველა სხვა სავაჭრო თუ საბაზრო ობიექტის საქმიანობა, გარდა სასურსათო მაღაზიებისა და სააფთიაქო ქსელებისა, შეჩერებულია.
"ვირუსის გავრცელების პრევენციისა და მოქალაქეთა ჯანმრთელობის დაცვის უზრუნველსაყოფად, არსებული ვითარების გათვალისწინებით, აჭარის მთავრობის მიერ მიღებული იქნა გადაწვეტილება, რომ 1 აპრილამდე მოხდეს სავაჭრო და საბაზრო ობიექტების, გარდა სასურსათო მაღაზიებისა და სააფთიაქო ქსელებისა, საქმიანობის შეჩერება.
1 აპრილამდე, ე.წ ხოფის ბაზრობის ყველა მოიჯარე საიჯარო მოსაკრებლისგან გათავისუფლდება. მოვუწოდებთ ბიზნეს სუბიექტებს, შეძლებისამებრ, ასევე განახორციელონ მათი მოიჯარეების საიჯარო ქირისგან გათავისუფლება.
გარდა მთავრობის მიერ მიღებული სხვადასხვა სახის გადაწყვეტილებებისა, ვირუსის გამო შექმნილ ვითარებაში, ძალიან მნიშვნელოვანია სოციალური პასუხისმგებლობა და მინდა აღვნიშნო, რომ არაერთმა ბიზნეს სუბიექტმა უკვე გამოთქვა მხარდაჭერის მზაობა, რისთვისაც გვინდა მათ მადლობა გადავუხადოთ.
ერთ-ერთთი მაღალი სოციალური პასუხისმგებლობის მაგალითი არის საწარმო „აჭარა ტექსტილი“, რომელიც მზად არის დაიწყოს სამედიცინო პირბადეების შეკერვა. კომპანიამ დღეს უკვე დაიწყო დაახლოებით 500 000 ცალი პირბადის წარმოება, რომელიც სახელმწიფოს უსასყიდლოდ გადაეცემა.
დღეს ჩვენ ვიმყოფებოდით აღნიშნულ საწარმოში, სადაც დაცულია თანამშრომელთა უსაფრთხოების ყველა ზომა. მინდა დიდი მადლობა გადავუხადო ტექსტილში დასაქმებულ მოქალაქეებს, რომლებიც ძალიან მაღალი თვითშეგნებით ეკიდებიან მათზე დაკისრებულ საქმიანობას“-განაცხადა აჭარის ფინანსთა და ეკონომიკის მინისტრმა ჯაბა ფუტკარაძემ ბრიფინგზე.
პირველადი მოხმარების სასურსათო პროდუქტებთან დაკავშირებით აჭარაში საკმარისი მარაგია. აჭარის სოფლის მეურნეობის მინისტრმა ტიტე აროშიძემ სურსათის იმპორტიორებს და საქონლის მწარმოებლებს მოუწოდა იმოქმედონ მაღალი სამოქალაქო თვითშეგნებით და არ მოახდინონ პროდუქციაზე ფასების მატება.
ამ დროისთვის ბათუმის ინფექციურ კლინიკურ საავადმყოფოში კორონა ვირუსის დადასტურებული ინფექციით 1 მოქალაქე გადის მკურნალობის კურსს. ბოლო 24 საათის განმავლობაში კლინიკაში გადაყვანილ 2 მოქალაქეს, ჩატარებული კვლევების შედეგად, COVID19 არ დაუდასტურდა.
როგორც ცნობილია, ბათუმის ინფექციურ საავადმყოფოში მოთავსებულია 1 პაციენტი, რომესლაც დადასტურებული აქვს COVID19, მისი მდგომარეობა სტაბილიურია და აღენიშნება ვირუსისთვის დამახასიათებელი მსუბუქი სიმპტომები.
რაც შეეხება იმ ორ მოქალაქეს რომლებიც ბოლო 24 საათის განმავლობაში კვლევისათვის კლინიკაში იმყოფებოდნენ, მათი შედეგები რამდენიმე წუთის წინ გახდა ცნობილი და არის უარყოფითი, მათ COVID19 არ დაუდასტურდათ. ისინი დაბრუნდნენ საკარანტინე სივრცეს 14 დღიანი პერიოდის გასვლამდე.
საკარანტინე სივრცეში ან თვითიზოლაციაში მყოფი მოქალაქეები მუდმივი მეთვალყურეობის ქვეშ იმყოფებიან, როდესაც მათ ვირუსისთვის დამახასიათებელი სიმპტომები აღენიშნებათ მოგვმართავენ და გადაგვყავს ინფექციური საავადმყოფოს ბოქსირებულ განყოფილებაში. სულ რამდენიმე წუთის წინ ამავე კლინიკაში კიდევ ერთი მოქალაქე შევიყვანეთ და როცა იქნება მისი შედეგები აუცილებლად გაცნობებთ.
აქვე ვისარგებლებ შემთხვევით და მოვუწოდებ ყველა მოქალაქეს, გაითვალისწინონ, ჯანდაცვის მსოფლიო ორგანიზაციის, საქართველოს მთავრობის, ჯანდაცვის სამინისტროსა და დაავადებათა კონტროლის რეკომენდაციები, მთავარი პრინციპი კი არის სოციალური დისტანცირება“ - განაცხადა აჭარის ჯანდაცვის მინისტრმა ზაალ მიქელაძემ.
აჭარაში მოწყობილია ექვსამდე საკარანტინე სივრცე, სადაც 300-მდე პირი 14 დღიან მონიტორინგს გადის. თვითიზოლაციაში 80-მდე მოქალაქე იმყოფება. ყველა მათგანზე დამყარებულია ეპიდემიოლოგიური კონტროლი.
