ავსტრიაში მგზავრობის მსურველთათვის, რომლებიც 14 დღის განმავლობაში იმყოფებოდნენ ახალი კორონავირუსის (COVID-19) მაღალი რისკის მქონე რეგიონებში გარკვეული შეზღუდვები წესდება. როგორც ავსტრიაში საქართველოს საელჩოს მიერ გავრცელებუ განცხადებაშია აღნიშნული, ამ ქვეყნებიდან ჩასული ადამიანები ვალდებულნი არიან საზღვრის გადაკვეთისას წარმოადგინონ ჯანმრთელობის მდგომარეობის შესახებ სამედიცინო (ექიმის) ცნობა და დაადასტურონ, რომ მათი მოლეკულურ-ბიოლოგიური ტესტი SARS-CoV-2 თან დაკავშირებით ნეგატიურია.
ავსტრიის რესპუბლიკის სოციალურ საკითხთა, ჯანმრთელობის, მზრუნველობისა და მომხმარებელთა უფლებების დაცვის ფედერალური სამინისტროს განკარგულების საფუძველზე, გაცნობებთ:
- მესამე ქვეყნის მოქალაქეები, რომლებიც ავსტრიაში მგზავრობამდე 14 დღის განმავლობაში იმყოფებოდნენ ახალი კორონავირუსის მაღალი რისკის მქონე რეგიონებში (რეგიონების ჩამონათვალი იხ. ბმულზე https://www.bmeia.gv.at/reise-aufenthalt/reisewarnungen/), ვალდებულნი არიან საზღვრის გადაკვეთისას წარმოადგინონ ჯანმრთელობის მდგომარეობის შესახებ სამედიცინო (ექიმის) ცნობა და დაადასტურონ, რომ მათი მოლეკულურ-ბიოლოგიური ტესტი SARS-CoV-2 თან დაკავშირებით ნეგატიურია.
- სამედიცინო (ექიმის) ცნობა გაცემული უნდა იყოს გერმანულ ან ინგლისურ ენაზე და შეესაბამებოდეს დანართში მოცემულ ნიმუშებს. (იხ. თანდართული დოკუმენტები)
- ცნობა გაცემული უნდა იყოს წარდგენამდე არაუგვიანეს 4 დღისა.
- იმ პირებს, რომლებიც ვერ შეძლებენ ხსენებული ცნობის წარდგენას, შესაძლოა უარი ეთქვათ ავსტრიაში შემოსვლაზე, ან მათ მიმართ გატარდეს ეპიდემიის შესახებ 1950 წლის კანონით გათვალისწინებული ღონისძიებები.
- ამასთან, ავსტრიის შესაბამისი უწყებების მხრიდან ავსტრიაში შემომსვლელი ან ტრანზიტით მყოფი პირების მიმართ ახალი კორონავირუსით ავადობის თაობაზე ეჭვის მიტანის შემთხვევაში, ეს პირები გაივლიან შესაბამის სამედიცინო შემოწმებას.
