ჩვენი მოთხოვნა არის იგივე, რის გამოც ადამიანებმა, ახალგაზრდებმა სისხლი დაღვარეს რუსთაველზე და თვალები დაკარგეს. ეს იყო პროპორციული არჩევნები, - განაცხადა „ევროპული საქართველოს“ ერთ-ერთმა ლიდერმა, დავით ბაქრაძემ ტელეკომპანია „პირველის“ ეთერში საარჩევნო სისტემასთან დაკავშირებული მოლაპარაკებების შესახებ.
მისი თქმით, ქართული ოცნება ცდილობს, რომ კონსტრუქციულ ნაბიჯად გამოიყვანოს ის, რომ 10 კაცი დაამატეს - ეს ზუსტად იგივეა, რაც გააკეთეს ლარზე, როცა დოლარი გახდა სამი და ახლა ცოტათი რომ გამყარდა, „უნდათ გვაჩვენონ, რომ არიქა, რა კარგები ვართ და ტაში დაგვიკარით“.
„ეს მათი სტილია - ძალიან გააფუჭებენ საქმეს, შემდეგ ამ ძალიან გაფუჭებულიდან ნაბიჯს უკან გადმოდგამენ და უნდათ, რომ ტაში დავუკრათ და არ დავუკრავთ ტაშს. ჩვენი მოთხოვნა არის იგივე, რის გამოც ადამიანებმა, ახალგაზრდებმა სისხლი დაღვარეს რუსთაველზე და თვალები დაკარგეს. ეს იყო პროპორციული არჩევნები. ამიტომ, ჩვენთვის პრინციპულად მნიშვნელოვანია, რომ არჩევნები იყოს პროპორციული და იმის გამო, რომ ქართულმა ოცნებამ პროპორციული ჩააგდო, ყველაფერი გააფუჭა, ქვეყანა კრიზისში ჩააგდო და ახლა ამ გაფუჭებულიდან უკან დგამს ნაბიჯს და გვეუბნება, რომ იცი, რა, მოდი 110 იყოს, ეს მათი მხრიდან მისაღებ დათმობად ნამდვილად არ ჩაითვლება“, - თქვა ბაქრაძემ.
