„სახელმწიფო ქონების შესახებ“ საქართველოს კანონში შესატანი ცვლილებების პროექტის მიხედვით, საქართველოს საპატრიარქოს შესაძლოა ქვეყანაში არსებული ყველა ეკლესიის მიმდებარედ 20 ჰექტარი ტყის ფართობი გადაეცეს.
კანონში ცვლილებების პროექტი პარლამენტს მთავრობამ წარუდგინა. კანონპროექტის ავტორია გარემოსა და სოფლის მეურნეობის სამინისტრო.
კანონპროექტის ავტორების განცხადებით, ეკლესიისთვის სახელმწიფო ტყის ფონდის მიჩენის მიზანია მოქმედი საეკლესიო და სამონასტრო კომპლექსების მიმდებარედ ბუნებრივ საზღვრებში 20 ჰექტრამდე ფართობზე თვითმყოფადი ბუნების შენარჩუნება და მომლოცველებისათვის მშვიდი გარემო პირობების შექმნა.
კანონპროექტის განმარტებით ბარათში აღნიშნულია, რომ გადასაცემი ფართობი უნდა განისაზღვროს იმგვარად, რომ გამოყოფამ არ გამოიწვიოს არსებული სატყეო ლიტერების საზღვრების დარღვევა.
სახელმწიფო ტყის ნაწილი, რომლითაც საქართველოს სამოციქულო ავტოკეფალური მართლმადიდებელი ეკლესია სარგებლობს მიჩენის მიზნით, შესაძლებელია, საკუთრებაში გადაეცეს მას.
კანონპროექტს საქართველოს პარლამენტმა პირველი მოსმენით მხარი უკვე დაუჭირა.
