შეერთებული შტატების კონგრესის წარმომადგენელთა პალატის წევრი, რესპუბლიკელი კონგრესმენი ტეხასიდან, რენდი ვებერი საქართველოს პრემიერ-მინისტრ გიორგი გახარიას კრიტიკული შინაარსის წერილს უგზავნის.
კონგრესმენი ამბობს, რომ ის უერთდება ორპარტიულ შეშფოთებას, რომელიც გამოითქვა აშშ-ის კონგრესში საქართველოს დემოკრატიული ღირებულებებისა და ეკონომიკური კეთილდღეობის განგრძობადი უკუსვლის შესახებ.
მისი თქმით, საქართველო-აშშ-ის სტრატეგიული პარტნიორობისა და აშშ-ის მიერ საქართველოსთვის გაწეული დახმარების გათვალისწინებით, იძულებულია შეურთდეს კოლეგებს, რომლებმაც მანამდე მიწერეს წერილი გიორგი გახარიას.
წერილში გამოთქმულია შეშფოთება დემოკრატიულ რეფორმებზე უარის თქმასა და მშვიდობიანი დემონსტრანტების წინააღმდეგ ძალადობასთან დაკავშირებით.
"რაც ყველაზე მთავარია პოლიტიკური ოპონენტების, მედიასაშუალებების, საერთაშორისო და ამერიკული კორპორაციებისა და სამოქალაქო საზოგადოების წევრების არასათანადო სამიზნედ ქცევისა და შევიწროების გამო", - ნათქვამია წერილში.
კონგრესმენი ხაზგასმით აღნიშნავს, რომ მან მხარი დაუჭირა წარმომადგენელთა პალატაში მიღებულ საქართველოს შესახებ აქტს, რომლის მიზანი საქართველოს სუვერენიტეტისა და ტერიტორიული მთლიანობის მხარდაჭერა იყო, რუსეთის მზარდი საფრთხეების ფონზე.
რენდი ვებერი დასძენს, რომ ეს აქტი არ ითვალისწინებს საქართველოს მთავრობის ისეთ მმართველობის მხარდაჭერას, რომელიც ეწინააღმდეგება დემოკრატიულ ღირებულებებს, კანონის უზენაესობას, სამართლიან და თავისუფალ არჩევნებს და სხვა.
კონგრესმენს მაგალითად მოჰყავს საქართველოს სტატისტიკის ეროვნული სამსახურის მონაცემები და წერს, რომ 2017 წლიდან პირდაპირი უცხოური ინვესტიციების რაოდენობა საქართველოში 50%-ით არის შემცირებული.
რენდი უებერი თავის წერილში ეხება ასევე კორუფციის აღქმის 2019 წლის ინდექსს და ამბობს, რომ საქართველოს რეიტინგი იკლებს და სტაგნაციას განიცდის.
"ასეთ გარემოში უცხოური ინვესტიციების შემცირება სიუპრიზი არ უნდა აღმოჩნდეს", - დასძენს კონგრესმენი.
კონგრესმენი ამბობს, რომ ამერიკული და ევროპული ბიზნესი საქართველოში მნიშნველოვანი გამოწვევების წინაშე დგას და მაგალითად ამერიკული კომპანია "ფრონტერას" საქმე მოჰყავს.
ვებერი გახარიას აფრთხილებს, რომ პირველად საქართველოს თანამედროვე ისტორიაში, აშშ-ში საქართველოს უარყოფითად და სიფრთხილით უყურებენ.
დასასრულისკენ კონგრესმენი ხაზგასმით აღნიშნავს, რომ საქართველო რჩება აშშ-ს მნიშვნელოვან მეგობრად და სტრატეგიულ პარტნიორად და იმედს გამოთქვამს, მეგობრებს შორის გულწრფელი საუბარი მომავალ წლებში ურთიერთობებს გაამყარებს.
რენდი ვებერი იმედოვნებს, რომ საქართველოს მთავრობა უარს იტყვის ამერიკული კომპანიების წინააღდეგ ქმედებებზე და წაახალისწებს აშშ-დან პირდაპირი ინვესტიციების ზრდას საქართველოში.
კონგრესმენი წერილის ასლებს ასევე უგზავნის აშშ-ის სახელმწიფო მდივანს, ვაჭრობის მდივანსა და ეროვნული უსაფრთხოების საკითხებში თეთრი სახლის მრჩეველს.