კრემლი საქართველოსთან მოლაპარაკებების წარმართვის აუცილებლობას "ნორმანდიული ფორმატის" ანალოგის მიხედვით ვერ ხედავს. ამის შესახებ რუსეთის საგარეო საქმეთა მინისტრის მოადგილემ ანდრეი რუდენკომ განაცხადა.
რუდენკოს თქმით, მოსკოვი ყოველთვის მიესალმება ორ ქვეყანას შორის ურთიერთბების განვითარებას, მაგრამ "საქმე არა ფორმატების რაოდენობაშია, არამედ პოლიტიკურ ნებაში, რათა გადაიჭრას დაგროვილი პრობლემები".
რუსეთის საგარეო საქმეთა მინისტრის მოადგილის განცხადებით, საქართველოსა და რუსეთს შორის ჟენევის ფორმატში მიმდინარეობს მოლაპარაკებები.
"ამ მოლაპარაკების ფორმატმა დაამტკიცა მისი აქტუალობა. დარწმუნებული ვარ, რომ მისი პოტენციალი ბოლომდე გამოყენებული არ არის", - დასძინა რუდენკომ.
მანამდე, საქართველოს პრეზიდენტმა სალომე ზურაბიშვილმა განაცხადა, რომ რუსეთთან არსებული მოლაპარაკებების ფორმატი ტექნიკური ხასიათს ატარებენ და არ მოაქვთ შედეგი, ამიტომ სასარგებლო იქნება თუ ქვეყნებს შორის დიალოგი "ნორმანდიის" ფორმატის მაგალითზე შედგება.
"ნორმანდიული ფორმატი" აღმოსავლეთ უკრაინაში მიმდინარე სამხედრო კონფლიქტის მშვიდობიანი გზით გადაჭრის მიზნით შეიქმნა, რომლის წევრები გერმანია, საფრანგეთი, უკრაინა და რუსეთი არიან.
