იმისათვის, რომ მიღწეულ იქნეს დემოკრატია და თავისუფლება, აუცილებელია კომპრომისზე წავიდეს ყველა პოლიტიკური პარტია, - განაცხადა კონგრესმენმა ადამ კინზინგერმა საქართველოს პარლამენტის თავმჯდომარესთან, არჩილ თალაკვაძესთან შეხვედრის შემდეგ. ამის შესახებ კინზინგერმა მიკრობლოგ "ტვიტერზე" დაწერა.
მისი თქმით, დემოკრატია ადვილი არ არის და სრულიად ნორმალურია, როცა თავისუფალ ქვეყანაში საპროტესტო აქციები მიმდინარეობს, მაგრამ აუცილებელია, რომ მან მშვიდობიანი ფორმა შეინარჩუნოს.
"მქონდა პროდუქტიული შეხვედრა საქართველოს პარლამენტის თავმჯდომარესთან, სადაც ორივე მხარემ კიდევ ერთხელ დავადასტურეთ ჩვენი საერთო მიზნები აშშ-საქართველოს ურთიერთობების კონტექსტში.
ვაფასებ სპიკერ თალაკვაძის ვიზიტს, რომელმაც მოგვცა შესაძლებლობა გვემსჯელა ჩვენი თანამშრომლობისა და მეგობრობის მნიშვნელობაზე.
ჩვენი შეხვედრის შემდეგ, მონაწილეობა მივიღე სხვადასხვა პოლიტიკურ პარტიებთან დიალოგში, რომლებიც ჩართულები არიან საქართველოში არსებულ პოლიტიკურ კრიზისში. მიღწეული პროგრესის ფონზე, ჩემთვის ნათელია, რომ მმართველ პარტიასა და ოპოზიციას შორის ძირეული და გადაუჭრელი განსხვავებები გრძელდება.
დემოკრატია ადვილი არ არის და სრულიად ნორმალურია, როცა თავისუფალ ქვეყანაში საპროტესტო აქციები მიმდინარეობს, მაგრამ აუცილებელია, რომ მან მშვიდობიანი ფორმა შეინარჩუნოს.
იმისათვის, რომ მიღწეულ იქნეს დემოკრატია და თავისუფლება, აუცილებელია, კომპრომისზე წავიდეს ყველა პოლიტიკური პარტია.
როგორც წარმომადგენელთა პალატაში საქართველოს მეგობართა ჯგუფის თანათავმჯდომარე, საქართველო-ამერიკის ძლიერი და მტკიცე ურთიერთობის ერთგული ვრჩები“, - განაცხადა კინზინგერმა.
