30-31 იანვარს, სამედიცინო და ფარმაცევტული საქმიანობის რეგულირების სააგენტოს მიერ, ფარმაცევტულ საქმიანობაზე ზედამხედველობისა და კონტროლის ღონისძიებების შედეგად, ქ. თბილისში განთავსებულ ერთ-ერთ აფთიაქში (სპეციალიზებული სავაჭრო ობიექტი), დაფიქსირდა ნებართვის გარეშე უკანონო ფარმაცევტული საქმიანობის განხორციელების, ასევე, პირველ ჯგუფს მიკუთვნებული ფარმაცევტული პროდუქტის რეალიზაციის (გაცემის), აღრიცხვის და სერიული აღრიცხვის დადგენილი წესების დარღვევის ფაქტები.
იურიდიული პირის მიერ სააგენტოში წარმოდგენილი შეტყობინების საფუძველზე, მას გააჩნია მხოლოდ მეორე და მესამე ჯგუფს მიკუთვნებული ფამაცევტული პროდუქტის საცალო რეალიზაციის უფლება. თუმცა, აფთიაქში კანონდარღვევით ხორციელდებოდა ფსიქოტროპული და ლეგალური ბრუნვის თვალსაზრისით, მასთან გათანაბრებული მედიკამენტების მიმოქცევა. სააგენტოს მიერ, ჩამორთმეული იქნა 336 ერთეული აღრიცხვის და სერიული აღრიცხვის დადგენილი წესის დარღვევით არსებული პირველ ჯგუფს მიკუთვნებული ფარმაცევტული პროდუქტი.
შედგა ადმინისტრაციული სამართალდარღვევის ოქმი, რომელიც, დადგენილი წესით, განსახილველად გადაეგზავნა თბილისის საქალაქო სასამართლოს ადმინისტრაციულ საქმეთა კოლეგიას. სამართალდარღვევა გათვალისწინებულია ,,წამლისა და ფარმაცევტული საქმიანობის შესახებ“ საქართველოს კანონის 37(2) მუხლით და 37(4) მუხლის მე-5 და მე-9 პუნქტებით.
