სარეკლამო კომპანია „პანდა“, რომელიც ფეისბუკმა რამდენიმე დღის წინ გაუქმებულ პროსახელისუფლებო გვერდებთან დააკავშირა, ფეისბუკის ბრალდებებს ადასტურებს. ვიდეოში, რომელიც „პანდამ“ გამოაქვეყნა, კომპანიის წევრი ამბობს, რომ ისინი ფეისბუკის საშუალებით ოპოზიციას, კერძოდ კი „ნაციონალურ მოძრაობას“ „აკრიტიკებდნენ“, თუმცა, ეს ქმედება არა „ქართული ოცნების სიყვარულით“ არამედ „დიქტატურის შიშით“ იყო განპირობებული.
“ფეისბუქი” გამოქვეყნებულ დასკვნაში საუბრობს ჩვენი მხრიდან ოპოზიციის კრიტიკაზე, დიახ ჩვენ, ჩვენს რესურსებში მართლაც ვაკრიტიკებდით ოპოზიციას, უფრო კონკრეტულად “ნაციონალურ მოძრაობას”. ჩვენ ამას არ ვაკეთებდით “ქართული ოცნების” სიყვარულით, არამედ, ვაკეთებდით ქვეყანაში დიქტატურის დაბრუნების შიშით, რადგან ჩვენ ეს ყველაფერი ჩვენს თავზე გვაქვს გამოცდილი. თქვენთვის რაოდენ გასაკვირიც არ უნდა იყოს, გვჯეროდა და გჯვერა იმის, რასაც ვაკეთებთ. ჩვენი ვალდებულებაა, რომ თავისუფლების წართმევის მცდელობით მიღებული ტკივილები, რომელიც 51-ე სკოლაში ჩვენმა კლასმა გამოვიარეთ მომავალში არც ერთმა ადამიანმა აღარ იგრძნოს“, - ამბობს პამდას წევრი.
შეგახსენებთ, რომ ფეისბუკმა ატლანტიკურ საბჭოსთან თანამშრომლობით ასობით ქართული გვერდი და ყალბი ანგარიში გააუქმა, რომლებიც საქართველოს მთავრობასთან, ასევე სარეკლამო კომპანია პანდასთან, იყო დაკავშირებული. ფეისბუკის ინფორმაციით, საქართველოში 39 ანგარიში, 344 გვერდი და 13 ჯგუფი გააუქმეს, რადგან დაადგინეს, რომ ამ გვერდებს ყალბი ანგარიშის მქონე პირები იყენებდნენ.
