"აზარტული თამაშები და მათი ხელშეწყობა ერთ-ერთი აქტუალური პრობლემაა ჩვენს ქვეყანაში", - ამის შესახებ ჟურნალისტებს საქართველოს კათოლიკოს-პატრიარქის ტახტის მოსაყდრემ, სენაკისა და ჩხოროწყუს მიტროპოლიტმა შიომ (მუჯირი) განუცხადა.
როგორც მან აღნიშნა, სულიერი თვალსაზრისით, აზარტული თამაშები არის აბსოლუტური ბოროტება.
"ეს ანგრევს ადამიანის პიროვნებას, ოჯახებს, ახდენს დეგრადირებას, ადამიანი ემონება ცოდვას, არის ცოდვის ტყვეობაში. ყველაფერი უნდა ვიღონოთ, რომ მოხდეს მათი შეზღუდვა. საპატრიარქო მონაწილეობდა პროექტის შექმნაში, რომელიც აზარტული თამაშების რეგულაციებს ითვალისწინებს", - დასძინა პატრიარქის მეუფემ.
საპატრიარქოში აზარტულ თამაშებთან დაკავშირებული შეხვედრა დღეს, 2019 წლის 20 დეკემბერს გაიმართა.
შეხვედრა საპატრიარქოსა და გაეროს ბავშვთა ფონდის (UNICEF) ინიციატივით ჩატარდა და მას ესწრებოდნენ როგორც სასულიერო პირები და UNICEF-ის წარმომადგენლები, ასევე - დარგის სპეციალისტები, ფსიქოლოგები და პარლამენტის წევრები.
