ბელარუსის დედაქალაქის ქუჩებში ასეულობით ადამიანმა მოიყარა თავი რუსეთთან ინტეგრაციის საწინააღდეგო არასანქცირებულ საპროტესტო აქციაზე.
აქციის მონაწილეებმა ცოცხალი ჯაჭვი შექმნეს მინსკის ცენტრალური გამზირის გასწვრივ, რომელიც დამოუკიდებლობის სახელს ატარებს.
კიდევ ერთი არასანქცირებული აქცია გაიმართა ოქტომბრის მოედანზე, რესპუბლიკის სასახლის მახლობლად.
აქციის მონაწილეებს, რომლებიც სკანდირებდნენ - "გაუმარჯოს ბელარუსს", "დამოუკიდებლობა" - ხელთ ეპყრათ ბელარუსის ძველი დროშები, თეთრი და წითელი ფერებით.
დღეს, 7 დეკემბერს, სოჭში მიმდინარეობს რუსეთისა და ბელარუსის პრეზიდენტების შეხვედრა, რომლებიც იმსჯელებენ ორი ქვეყნის ინტეგრაციის გაღრმავების შესაძლებლობებზე.
მანამდე ბელარუსის პრეზიდენტმა ალექსანდრ ლუკაშენკომ პარლამენტში გამოსვლისას განაცხადა, რომ ის არასდროს მოაწერს ხელს ისეთ ხელშეკრულებას, რომელიც ქვეყანას სუვერენიტეტს დააკარგინებს.
ფოტო: AP