დიდ ბრიტანეთში საქართველოს მოქალაქეების დაკავების ფაქტს საქართველოს საელჩოში არ ადასტურებენ.
ამის შესახებ "ჯი-ეიჩ-ენს" დიდ ბრიტანეთში საქართველოს საელჩოს თანამშრომელმა ალექსანდრე ღვთისიაშვილმა განუცხადა.
"ჰაკერების დაკავების შესახებ ინფორმაცია რამდენიმე დღის წინ გახდა ცნობილი, ამიტომ მათ შორის საქართველოს მოქალაქეები რომ ყოფილიყვნენ, ბრიტანელი სამართალდამცველები აუცილებლად დაგვიკავშირდებოდნენ", - აღნიშნა ღვთისიაშვილმა.
როგორც ცნობილია, უცხოური სააგენტოების მიერ გავრცელდა ინფორმაცია, რომ დიდ ბრიტანეთში მილიონობით ფუნტი სტერლინგის საბანკო ანგარიშებიდან მოპარვაში საქართველოს, უკრაინის, ლატვიის, ბელორუსისა და ესტონეთის მოქალაქეები არიან დაკავებული. დაზუსტებული ინფორმაციით სულ დაკავებულია 20 ადამიანი. ყველა ისინი ყოფილ საბჭოთა ქვეყნებიდან არიან ჩასული დიდ ბრიტანეთში.
კონკრეტდება ინფორმაცია იმასთან დაკავშირებით, რომ ასევე დაკავებულია ერთი ეჭვმიტანილი საქართველოს მოქალაქე, რომელსაც ბრალი წაყენებული აქვს კანონის პირადობის მოწმობებთან დაკავშირებით. დაკავებულთა ასაკი 23-დან 34 წლამდეა.