მოსკოვის ექს-მერი იური ლუჟკოვი მისი თანამდებობიდან განთავისუფლებას შესახებ გადაწყვეტილებას სასამართლოში გაასაჩივრებს.
ამის შესახებ "ინტერფაქსს" ლუჟკოვის ახლო მეგობარმა, დუმის დეპუტატმა, მომღერალმა იოსიფ კობზონმა განუცხადა.
"იური ლუჟკოვმა გუშინ მითხრა, რომ ის სასამართლოში აპირებს სარჩელის შეტანას. ჩემი აზრით, ეს უშედეგო იქნება, ამის შესახებ ლუჟკოვს ვუთხარი კიდეც, მაგრამ ის პრინციპული ადამიანია და მაინც თავისებურად მოიქცევა", - განაცხადა კობზონმა.
ამასთან, კობზონმა აღნიშნა, რომ მოსკოვის ექს-მერი რუსეთს არ დატოვებს, იმ შემთხვევაშიც კი, თუ მასზე ან მის გარემოცვაზე, სისხლის სამართლის საქმეს აღძრავენ.
დუმის დეპუტატის თქმით, "ლუჟკოვი უმუშევარ არ დარჩება. ეს იქნება პოლიტიკური საქმიანობა, თუ შიდა სამეურნეო საქმიანობა, ამას დრო აჩვენებს".
შეგახსენებთ, რომ მოსკოვის მერი იური ლუჟკოვი რუსეთის ფედერაციის პრეზიდენტის ბრძანების საფუძველზე გადააყენეს. როგორც მოგვიანებით ჟურნალისტებთან საუბრისას მედევდევმა აღნიშნა, ლუჟკოვის გადაყენების გადაწყვეტილების მიზეზი ის გახდა, რომ მერისადმი ცენტრალუ ხელისუფლების ნდობა დაიკარგა.
