საქართველოსთან ავიამიმოსვლა, შესაძლოა, უახლოეს ხანში აღდგეს , - განაცხადა რუსეთის სახელმწიფო სათათბიროს დსთ-ის საქმეთა კომიტეტის თავმჯდომარემ ლეონიდ კალაშნიკოვმა.
„კონკრეტულ დროს ვერ დაგისახელებთ. ვფიქრობ, ამის იმედი უახლოეს ხანებში უნდა გვქონდეს“,- განაცხადა კალაშნიკოვმა.
კალაშნიკოვმა აღნიშნა, რომ ბოლო დროს საქართველოში რუსეთიდან ჩასულ ტურისტებს არანაირი პრობლემა არ ექმნებათ და მათი უსაფრთხოება უზრუნველყოფილია, რის შესახებაც მანამდე მოუწოდა რუსულმა მხარემ საქართველოს.
“ბოლო დროს ექსცესები საქართველოში არ არის, თუმცა, მიუხედავად ამისა, პოლიტიკოსებმა უნდა გამოავლინონ ნება, მათ შორის, ახალმა პოლიტიკოსებმაც, რომლებიც მოდიან და ამასთან დაკავშირებით რაღაც განცხადებებს აკეთებენ. უბრალოდ არაფერი ხდება“, — აღნიშნა ლეონიდ კალაშნიკოვმა.
შეგახსენებთ, რომ თბილისში, 20 ივნისს განვითარებული მოვლენების შემდეგ, რუსეთის პრეზიდენტმა 21 ივნისს ხელი მოაწერა განკარგულებას რუსეთ-საქართველოს შორის პირდაპირი საავიაციო მიმოსვლის შეწყვეტის თაობაზე, რომელიც ძალაში 8 ივლისიდან შევიდა. რუსეთის მხრიდან დაწესებული სანქციების გამო, ავიაკომპანია „ჯორჯიან ეარვეისი“ თბილისი-მოსკოვი-თბილისის მიმართულებით პირდაპირი ფრენები შეცვალა და მგზავრებს თბილისი-(ერევანი)-მოსკოვი, (ერევანი)-თბილისის მარშრუტით ემსახურებოდა.
