ვაკის პარკის მედიათეკაში „საქართველოს ახალგაზრდული ბიზნეს-თასი 2019“-ის გამარჯვებულები დააჯილდოვეს. კონკურსი ლიეტუვას რესპუბლიკის საელჩოს საქართველოში, საერთაშორისო აუდიტორული კომპანია PKF Georgia-სა და Lithuanian Development Cooperation-ის ერთობლივი ორგანიზებით ჩატარდა და მისი მიზანი ახალგაზრდებში ბიზნესის მართვის უნარების აღმოჩენა და გაძლიერება იყო.
შეჯიბრის პირველი ეტაპი 1 კვირის განმავლობაში მიმდინარეობდა და მასში 25-დან 35 წლამდე ასაკის 200-მდე მონაწილე იყო ჩართული. მონაწილეობა კონკურსანტებს შეეძლოთ როგორც ინდივიდუალურად, ასევე 2 ადამიანისგან დაკომპლექტებული გუნდების ფორმატში. კონკურსი დაფუძნებული იყო ვირტუალურ ონლაინ ბიზნეს-გარემოზე „Simformer Business Simulation“, სადაც მონაწილეები მართავდნენ კომპანიას ვირტუალურ ბიზნეს-სიმულატორში, რომელიც ბიზნესის მართვისა და დაგეგმვის უნარების განვითარებისთვის შეიქმნა. კონკურსის მონაწილეებს შეჯიბრში ჩართვა გამართული ინტერნეტ-კავშირით ნებისმიერი ადგილიდან შეეძლოთ. საუკეთესო შედეგების მქონე მონაწილეები კონკურსის მეორე ეტაპზე გადავიდნენ, რომელმაც 30 სექტემბერს, ვაკის პარკის მედიათეკაში დილიდან აიღო სტარტი.
„მსხვილი საერთაშორისო აუდიტორული კომპანია PKF, უკვე 12 წელზე მეტია ქართულ ბაზარზეა. ჩვენ ვგრძნობთ სოციალურ პასუხისმგებლობას და მუდმივად ვცდილობთ ხელი შევუწყოთ ახალი თაობის განვითარებას, მით უმეტეს, როცა საკითხი ბიზნესის მართვის უნარებს ეხება. ამ კონკურსს გარკვეულწილად კომპიუტერული თამაშის სახე ჰქონდა, რაც მას სახალისოს ხდიდა, თუმცა გარდა ამისა მონაწილეებს საკმაოდ სერიოზული ცოდნა მისცა და საკუთარ თავში ბიზნესის მართვის უნარების აღმოჩენასა და განვითარებაში დაეხმარა. ამიტომ, ჩვენი კომპანია ყოველთვის მზადაა მსგავსი ტიპის აქტივობებში იყოს ჩართული და ბიზნეს-პერსონების ახალი თაობის განვითარებაში გარკვეული წვლილი შეიტანოს“- აცხადებს PKF Georgia-ს პარტნიორი გრიგოლ სიდამონიძე.
ფინალური ეტაპის ფარგლებში დაგეგმილ ღონისძიებაზე მაღალი შედეგების მქონე მონაწილეები ერთ სივრცეში შეიკრიბნენ და 7 საკონკურსო რაუნდი გაიარეს. აღსანიშნავია, რომ მეორე ეტაპის მიმდინარეობისას მათ ჰქონდათ ცოცხალი მხარდაჭერა, როცა კონკურსის პირველ ეტაპზე ისინი ტრენერებისგან მხარდაჭერას ონლაინ იღებდნენ. ღონისძიების დასკვნით ნაწილში ფულადი პრიზებით 3 გამარჯვებული დაჯილდოვდა. პირველი ადგილი სტუდენტთა ორკაციანმა ჯგუფმა მოიპოვა, რომლებიც პარალელურად ბიზნეს-სტარტაპს ფლობენ და დაგროვილ გამოცდილებას სწორედ ამ საქმეს მოახმარენ. დაჯილდოვების ცერემონიალზე სიტყვით ლიეტუვას რესპუბლიკის საგანგებო და სრულუფლებიანი ელჩი საქართველოში გიედრიუს პოუჯუნასი და PKF Georgia-ს მმართველი პარტნიორი დავით გვეტაძე გამოვიდნენ.
