თურქეთში ქართული ღვინის ექსპორტის გასაზრდელად საქართველოს პრემიერ-მინისტრმა ნიკა გილაურმა სოფლის მეურნეობის მინისტრის საგანგებო დავალება მისცა. როგორც მთავრობის სხდომაზე ნიკა გილაურმა განაცხადა, ბაკურ კვეზერალი უახლოეს დღეებში თურქეთის სოფლის მეურნეობის და ვაჭრობის მინისტრს უნდა შეხვდეს.
"თურქეთთან თავისუფალი ვაჭრობის შესახებ ხელშეკრულება გვაქვს გაფორმებული, რაც ითვალისწინებს თურქეთში 1 მილიონი ლიტრი ქართული ღვინის გატანას ყოველგვარი სავაჭრო მოსაკრებლის გარეშე. რეალურად კი კომპანიებმა მხოლოდ 40-60 ათასი კვოტა აითვისეს და დანარჩენი კვოტა ასათვისებელია", - განაცხადა ნიკა გილაურმა.
როგორც პრემიერ-მინისტრი განმარტავს, თურქეთში ქართულ ღვინოზე მოთხოვნა არსებობს, რადგან თურქეთის კურორტებს ძალიან ბევრი ტურისტი სტუმრობს პოსტ საბჭოთა სივრცედან და მათთან ქართულ ღვინოს პრომოუშენი არ სჭირდება. "თურქეთის საზაფხულო კურორტებს ძალიან ბევრი დამსვენებელი სტუმრობს პოსტსაბჭოთა ქვეყნებიდან. მათ კარგად იციან ქართული ღვინის შესახებ და შესაბამისად თურქეთში რეკლამა არ სჭირდებათ," - განაცხადა ნიკა გილაურმა.
დღესვე მთავრობის სხდომაზე პრემიერ-მინისტრმა ბაკურ კვეზერელს მეორე დავალებაც მისცა. კვეზერელს ამერიკაში ქართული ღვინის პრომოუშენის გაძლიერება დაევალა.