უახლოეს პერიოდში, ფინანსთა სამინისტროს მომსახურების სააგენტო ონლაინ განვადების სერვისს აამოქმედებს. როგორც სააგენტო "ჯი-ეიჩ-ენთან" საუბრისას ფინანსთა სამინისტროს მომსახურების სააგენტოს ხელმძღვანელმა გრიგოლ ბაიბურთმა განაცხადა, კონკრეტულ ბანკთან შეთანხმება უკვე მიღწეულია და მემორანდუმის გაფორმების შემდეგ სააგენტოს კლიენტებს ონლაინ განვადების სერვისით სარგებლობაც შეეძლებათ. ბაიბურთის განმარტებით, მიზნობრივ სესხს სააგენტოს ყველა საიმედო კლიენტი მიიღებს.
მომსახურების საგენტო კლიენტების საანდოობას და სააგენტოსთან თანამშრომლობას დააკვირდება ამის შემდეგ კი შედგება სპეციალური რეიტინგი და მაღალი ქულების ქმონე კლიენტს აღნიშნული სერვისით სარგებლობა შეეძლება.
შეგახსენებთ, რომ სახელმწიფო საკუთრებაში მყოფი ქონების ყიდვა მომხმარებელს უკვე სახლიდან ან ოფისიდან გაუსვლელად შეუძლია. ფინანსთა სამინისტროს მომსახურების სააგენტო მათ სერვისის თანამედროვე და მარტივ გზას - ინტერნეტაუქციონს სთავაზობს.
ამიერიდან, მომხმარებელს შეუძლია სახლიდან ან ოფისიდან გაუსვლელად დაათვალიეროს მომსახურების სააგენტოს ვებგვერდი www.eauction.ge, შეარჩიოს მისთვის სასურველი ნივთი და მიიღოთ მონაწილეობა აუქციონში. მაქსიმალურად გამარტივებულია გადახდის მექანიზმიც: საკრედიტო ბარათის არსებობის შემთხვევაში, გადახდა წარმოებს პირდაპირ ვებ-გვერდიდან. აღსანიშნავია, რომ ინტერნეტაუქციონზე გამოტანილი ქონების ფასი საბაზრო ღირებულებაზე 20% -ით ნაკლებია.
„ეს ძალიან მნიშვნელოვანი პროექტია. ვცდილობთ მაქსიმალურად გავითვალისწინოთ მომხმარებლის ინტერესები და შევთავაზოთ მათ გამარტივებული სერვისი. ამ პროექტში მნიშვნელოვანია, რომ მომხმარებელს აღარ დასჭირდება ჩვენს ოფისში მოსვლა და ბიუროკრატიული პროცესების გავლა. მას შეეძლება დარეგისტრირდეს საიტზე და მიიღოს მონაწილეობა ინტერნეტვაჭრობაში. მოსახერხებელია გადახდის მექანიზმით - როგორც საბანკო გზით, ისე საკრედიტო ბარათის მეშვეობით," - განაცხადა გრიგოლ ბაიბურთმა.
აღნიშნული მომსახურება ფინანსთა სამინისტროს მიერ 2010 წელს ელექტრონული მომსახურების განვითარების კუთხით დაგეგმილი სიახლეების ნაწილია და მიზნად ისახავს მომხმარებლისთვის სანდო ონ-ლინე რესურსის შეთავაზებას, რომლის საშუალებითაც მომხმარებელი გამარტივებული პროცედურებით და სწრაფად შეძლებს მისთვის სასურველი ნივთის შეძენას.
სააგენტოს ვებ-გვერდი მომხმარებელს საშუალებას აძლევს,, აგრეთვე გაეცნოს ფინანსთა სამინისტროს მომსახურების სააგენტოს კუთვნილ 3 მაღაზიაში გასაყიდად გამოტანილი საქონლის სრულ ჩამონათვალს, ფოტოებს და ფასებს, ასევე ვებგვერდზე ქვეყნდება განცხადებები საჯარო აუქციონის გზით ქონების რეალიზაციის შესახებ.